Ny Njarinintsy dia mitovitovy fiseho amin'ny Ambalavelona ihany. Ody ratsy ataony olona hono no azahoana azy. Raha misy olona te hanisy ratsy olona iray dia mankany amin'ny mpanao ody izy, dia io mpanao ody io no mametraka ilay ody eo amin'ny lalan'ilay olona asian-dratsy. Matetika dia tovovavy no voany satria ireo no matetika tsy manaiky hiaraka amin'ny lehilahy izay mila azy. Tezitra ity farany dia manisy ratsy ilay tovovavy.
Ny fisehony:
Somary mahatsiaro mangatsiaka ilay olona, avy eo mangovitra, dia mihamena ny masony no miherikerika, somary mitomany moramora avy eo amin'izay mikiakiaka ka iny dia rifatra tsy tana intsony. Indraindray na tokotany avo be aza dia vitany ny mihoatra an'iny. Ny tenako dia efa nahita fa trano misy rihana telo tonga dia itsambikinany avy any ambony nefa tsy tapaka izy ary tsy potraka fa lasa ihany mitady toerana ivoahana. Aiza ny tiany aleha? any an-dranomasina hono. Ka raha vao manitsaka ranomasina hono ilay olona dia maty. Efa be hono ny maty nanitsaka ranomasina fa tsy mbola nahita aho aloha.
Matetika dia misy manenjika ilay zaza rehefa voan'izany ary matetika dia tratra ihany raha ny tao ampianaranay no resahiko. Avy eo felahana mafibe izy dia taitra ary folahana mafy ny ankihibeny. Mihena ny fikiakiahana ary mitomany moramora izy dia milamina amin'izay. Matory toy ny tsy teo indray, ka rehefa tairany dia toy ny ankizy rehetra ihany. Tsy mahatadidiy izay nanjo azy.
Mankany amin'ny tromba hono no fanalana azy. Ary be no tany fa sitrana tokoa satria tsy mihetsika intsony izay nilaza fa tany. Matetika dia miara mihetsika ilay izy ka ankizy iray no voa dia mihetsika daholo ny an'ny hafa, eo vao tena sarotra ny raharaha satria tsy misy fianarana vita moa samy enjehina daholo ny babaiso rehetra.
Mampalahelo e. Izay no tany. Taty afara raha nanao fanadihadihana aho dia nilaza ny olona fa karazana trade ihany io na varotra. Misy ny mpampiditra njarinintsy ary misy ny mpanala azy mahay ary samy mahazo vola daholo izay antokon'olona izay.
Atao akory fa olombelona isika!
