Afo tsy matin'ny rano
Fa fihetsika nampihodivitra,
Ary lamba nihelatra monja;
Sy hanitra nentin'ny rivotra,
Fitopan'ny zipo manonja:
Dia zavatra tsy inona akory,
Kinanjo nofisi-matory
Fa maso niherika foana,
Ary tsiky niantefa tsy fidy;
Eritreritra sendra tsaroana,
Toa votsy nampangidihidy
Kinanjo dia lasa nivaona
Aretina mandavan-taon!
Dia miverina fa tositosy,
Zanak'omby maniry kijana,
Sola-bato ka tian-janak'osy,
Volan-tsinana tsara zahana!
Tsy nampoizina indrindra ary izany,
'Ty fisainako lasa nankany!
Ny toerana lavitra akaiky,
Ny làlana mahasadaika,
Fa izy mandà sy manaiky,
Kanefa ity 'zaho efa maika:
Maninona moa ra' lazaina,
Hiononan'ny fo noratraina!
Vetsovetso ka lasa nihoatra,
Nofy mamy ka tiana hateza,
Ny ao am-pony tsy fantatra loatra,
Misy aloka mangezaheza :
Miefitrefitra anie ny ao anaty,
Ka sao tsy fitia mandra-maty!
Fitiavana kely nisisika,
Fitiavana kely tsy levona;
Toa zavatra manitikitika,
Toa sery nirina hampihevina;
Kinanjo nampiditra angano,
Tonga afo tsy matin'ny rano
RODLISH
