Inona ny Konfesy?
Ny konfesy dia fomba katolika izay entina hanehoana indrindra ny indrafon'Andriamanitra. Tsy ny halemen'ny mpanota no tena banjinina fa ny haben'ny famelan-keloka omen'Andriamanitra. Rehefa hikonfesy izany ny olona iray dia tsy mikombona amin'ny tenany fa misokatra kosa amin'Andriamanitra.
Io toe-panahy io no manintona ny olona hikonfesy. Raha toa misy katolika tsy dia mazoto mikonfesy dia matetika manadino an'io lafiny io. Andriamanitra no miantso fa tsy isika no manatona.
Ahoana ny fomba fikonfesy?
Ny konfesy dia tsara raha atao mialohan'ny handraisana ny Eokaristia. Fo madio no handraisana ny Vatana sy Ran'i Jesoa. Ny didin'ny Eglizy izay manambara hoe tokony hanao komonio tsara farafaharatsiny amin'ny Paka, dia mamehy hoe farafaharatsiny indray mandeha isan-taona dia tokony hikonfesy.
Misy fomba roa azo anaovana ny konfesy.
Ny fomba voalohany dia matetika fanao rehefa maro olona mpikonfesy (andro fety, andro alahady, programa any am-piangonana). Manatona ny pretra ny kristianina dia mandohalika ary milaza ny fahotàna. Azon'ny pretra atao sy adidin'ny pretra ny manoro ny fomba fikonfesena ho an'ny kristianina tsy zatra mikonfesy.
Ny fomba faharoa dia malakaka kokoa. Mifanao fotoana amin'ny pretra, izay mahafaka azy, dia atao mandritra ny fifampiresahana aminy ny konfesy. Tsy voatery mandohalika, ary afaka miresaka maharitra. Mila marihana tsara fotsiny ny fanombohan'ny konfesy, izany hoe lazaina amin'ny pretra fa hanomboka ny konfesy mba tsy hampifangaro azy amin'ny resaka natao teo aloha.
Ity fomba faharoa ity, izay amporisihana be be kokoa taorian'ny Konsily Vatikana faharoa, dia tsy mionona fotsiny amin'ny fitanisana ny fahotana. Azo atao ny mandray lahatsoratra iray ao amin'ny Tenin'Andriamanitra dia avy amin'iny no anaovana fandinihan-tena. Mety ho lavalava kokoa izany ity fomba ity ka izay no ilàna ny fakàna fotoana mialoha amin'ny pretra. Azo atao matetika ihany koa ity fomba faharoa ity. Ny relijiozy na pretra sasany izay mampiasa ity fomba ity dia misy mikonfesy isanandro... satria ny zavatra lehibe tena atao dia ny fibanjinana ny famindram-pon'Andriamanitra. Tsy tokony hatahotra raha toa tsy voalaza daholo ny fahotana rehetra satria mety tsy voakasik'ilay tenin'Andriamanitra novakiana.
Nahoana no mikonfesy amin'ny pretra?
Fanontaniana matetika miperaka io. Angaha moa tsy afaka mandeha mivantana amin'Andriamanitra ny Katolika no mandalo amin'ny pretra? Afaka dia afaka mandeha mivantana amin'Andriamanitra tokoa ny Katolika, ary isaky ny mivavaka sy mangataka famelan-keloka amin'ny fotoana ankoatra ny konfesy izy dia miresaka mivantana amin'Andriamanitra. Ao amin'ny vavaka nampianarin'ny Tompo rahateo dia misy hoe "Avelao ny fahotanay". Izany hoe isaky ny mamerina io vavaka io koa dia mangataka famelan-keloka mivantana amin'Andriamanitra. TOMBONY ho an'ny Katolika izany ny konfesy, satria ankoatra ny vavaka mivantana izay itovizany amin'ny hafa, dia nomena fahasoavana manokana koa izy handray ny famelan-keloka amin'ny sakramentan'ny konfesy.
Voavela tokoa ve ny fahotana rehefa mikonfesy?
Andriamanitra irery ihany no mamela ny fahotana. Matoky anefa ny olona mandeha mikonfesy raha tena mandeha amin'ny fony tokoa fa miseho mandritra ny sakramentan'ny fampihavanana ny famindrampon'Andriamanitra.
Araka ny baiboly ve ny konfesy?
Anisan'ny teny ao amin'ny Baiboly hakàna ny hevitry ny konfesy ny tenin'i Jesoa tamin'ny mpianany nanao hoe "Izay fahotàna avelanareo dia ho voavela, ary izay tànanareo dia hovoatana". I Kristy izany no mamela ny fahotàna. Ankoatra ny voalaza ao amin'ny baiboly anefa dia efa nifandimbiasan'ny mpino nandritra ny taona mifandimby koa ny konfesy. Ary ny fampianaran'ny Fiangonana ankehitriny dia mbola mamporisika hikonfesy. Ireo toko telo ireo dia ny baiboly, ny lovatsofin'ny mpino, ary ny fampianaran'ny Fiangonana, izay fototry ny finoana Katolika, no fototry ny konfesy ihany koa.
Ahoana ny momba ny asa fivalozana?
Rehefa avy mandray ny famelan-keloka ny mpikonfesy dia asain'ny pretra manao asa fivalozana. Famantarana fotsiny ihany no atolotry ny pretra fa ny tena asa fivalozana dia ny fiovam-po asehon'ny Kristiana. Izay no maha sakramentan'ny fampihavanana ny konfesy. Ny vokatry ny konfesy dia fihavanana amin'Andriamanitra sy ny olombelona.
