Andeha ary hovaliana tsirairay ilay fanontaniana :
Fa maninona ny Protestanta no tsy mino ny olo-masina ?
Ny valiny tsotra dia hoe ny an'ny protestanta dia ny baiboly ihany no support ampiasaina, ny an'ny katolika dia misy ny atao hoe tradition (lovatsofina). Ianao koa ve moa hatoro an'izany fa mba te ha..... indray ianao a. !!!!!
Fa raha te handalina kely ianao ary dia mba vakio ito gazetiko eto ambany ito:
Tsy maintsy hiditra kely amin'izay fahafatarako ny fiangonana katolika aho eto. Tsy ho fanaratsiana akory fa mba etiko hamaliana ilay fanontaniana eo ambony ihany. Mety ho diso aho amin'izany satria tsy ao anatin'ilay fiangonana ka afaka hahitsinareo raha misy mivilana ny fahitako ny fiangonana katolika eto.
Miainga ao amin'izay lazain'i Marka aho:
Mark.9
Mety misy rafitra mametraka fa misy lehibe sy kely eo anivon'ny fiangonana, mihevitra fa tsy mitovy avokoa ny olona rehetra fa misy ny mpitarika ary misy ny natokana ho tarihina, misy ny mpanompo ary misy ny tompoina, misy ny akaikikaiky an'i Jesoa kokoa. Io firehan-kevitra io anefa dia tena toe-tsain'izao tontolo izao ary natsimbadik'i Jesoa eto amin'ity Mark.9:35 eto hoe
izay te ho lehibe aminareo no farany.
Araky ny fanehoan-kevitry ny katolika aloha (ahitsio aho raha diso) dia tsy ny baiboly ihany no ekeny ho soratra masina azo ampiasaina fa eo ihany koa ny ataon'izy ireo hoe tradition na ny lova-tsofina. Ary ao anatin'izany tradition izany no mametraka ireo konsily eo anivon'ny fiangonana. Fa ny protestanta kosa dia mametraka fa ny soratra masina irery ihany no fanitsiana sy fototra hitaizana ny fiangonana. Misy ihany ny fanapahan-kevitra eo anivon'ny fiangonana , ohatra hoe ny fanapaha-kevitry ny mpandray, ny foibe, fa ireny dia mety miova avokoa araka ny vani-potoany, fa ny baiboly ihany no tsy miova.
Ireo nanorona ny fiangonana protestanta dia nametraka hoe fanjakam-pisorona ny fiangonana protestanta, mitovy avokoa ny olona rehetra, tsy misy intsony izany mpitondra fivavahana, rava ny hatsana mampisaraka ny mpitondra fivavahana sy ny tsy mpitondra fivavahana. Na ny teny hoe laika aza dia tsy voambolan’i Kalvin fa vao isika izao no mampiditra izany. Satria ny teny hoe laika dia efa manavaka sahady amin'ny mpitondra fivavahana. Izay no ao ambadiny, ary ny protestanta tsy nampiasa ny voambolana laika mihitsy hatrizay satria samy laika daholo ny vahoakan'Andriamanitra, fa tsy hoe mpitandrina izy dia tsy laos na laika, fa rehefa tsy laika izy izany dia tsy vahoakan'Andriamanitra. Ary tsy hoe laika ny olona dia tsy mpitondra fivavahana, tsy izay koa.
Amin'ny protestanta dia tsy ny ady laharan'olombelona no mahamaika fa ny fanetretenan'ny mpanompon'Andriamanitra.
Izay aloha izany no antony voalohany : resaka rafitra eo anivom-piangonana. Ka ao anatin'ny rafim-piangonana katolika mihitsy ilay olo-masina efa maty.
Tsy miteny aho hoe diso ny an'ny katolika, marina aminy ilay izy satria mahita lovatsofina mifanaraka amin'izany izy, saingy tsy mety amin'ny protestanta satria tsy avoitran'ny baiboly manontolo.
Tohizako amin'ny
Mark.10:35 - 45
Jesoa matetika dia miteny hoe mangataha dia omena ianareo, mitadiava dia hahita ianareo, raha mitoetra ao anatinareo ny teniko dia angataho izay tianareo na inona na inona fa ho azonareo izany. Baiko mihitsy io mangataka io.
Fa eto amin'ity Mark.10 ity dia nisy nangataka fa tsy nahazo. Zanak'i Zebedio (jakoba sy jaona) no tonga nanao fangatahana tamin'i Jesoa hoe
Jesoa , hangataka aminao izahay, rehefa tonga any amin'ny voninahitrao Ianao, aleo ny iray aminay roalahy mba ho eo ankavananao ary ny iray ho eo ankavianao.
Ireto zavatra ireto no fahadisoana ary tian'ny Tompo hampitaina eto: naverin'i Jesoa teo amin'ny tantaran'ny famonjena izy roalahy ireto. Ianao ve moa tsy mba haniry ny ho akaikin'Andriamanitra, tsy mba hahafinaritra anao ve raha ianao no tena eo anilany! Fa Jesoa niteny fa tsy anjarany no manome izany toerana izany fa efa mipetraka ho an'izay nanamboarana azy. Izany hoe tsy misy reservation any amin'ny fanjakan'Andriamanitra fa mbola samy eo an-tany fiadiana daholo ny rehetra. Tsy misy milaza mihitsy fa ianao io no eo ankavanan'i Jesoa. Tsy mbola fantatra satria tsy mbola tonga ny fitsaran'Andriamanitra. Noho izany ny fitsarana ihany no afaka milaza manao hoe i koto no eo ankavian'i Jesoa, i Soa no eo ankavanany. Izay no mahatonga ny Tompo niteny hoe tsy mbola fotoan'ny fametrahana ny olona eo amin'ny teorany izao. Mbola samy ao anaty toeram-piadiana, ao an-tany fiadiana avokoa isiaka rehetra. Marina fa efa nahavita ny adiny ireo teo alohantsika toa ny apostoly, dia rariny ve raha toa ka tonga dia apetraka mialoha eny an-kavia sy an-kavanana, dia ahoana izany ireo olona any aoriana izay tsy maintsy mbola hiady sy hiaritra ny fangirifiriana. Mety amin'ireo no misy Mosesy na Jakoba vaovao, noho izany tsy mbola famoahana ny valim-pifidianana izao fa mbola misy ny eo an-tany fiadiana.
Rehefa mivoaka ny didim-pitsarana, eo vao ho fantatra ny antsipiriany.
Izay no mahatonga ny fiangonana reformée tsy manaiky ny fampianaran'ny olo-masina fa raha ny baiboly no jerena dia tsy mbola misy manambara mihitsy fa efa any amin'ny fanjakan'Andriamanitra ireny lazaina fa olo-masina ireny fa ny azo antoka fa efa any dia Jesoa . Misy maritiora any fa ny Tompo no mahalala, misy mpanompon'Andriamanitra be dia be any fa ny Tompo no mahalala. Izay no mahatonga hoe rehefa mivavaka isika dia manatona an'Andriamanitra noho i Jesoa fa tsy afaka miteny hoe azonao antoka fa any i Jaona zanak'i Jebedio. Eny e, andeha atao hoe any izy, fa tsy afaka miteny mihitsy ianao hoe ry jaona ô, tahio aho fa ianao no eo akaikin'i Tompo afaka mibitsibitsika aminy eo. Tsia, tsy mbola fotoan'izany mihitsy izao. Fa tsy anjarantsika izany fa olona mbola mitovy laharana amintsika daholo ireny rehetra ireny, mbola samy miandry eo amin'ilay toerana fiandrasana ny fitsaran'Andriamanitra avokoa isika rehetra. Hoy ny Hebreo hoe
tsy mbola natao tanteraka ireo nialoha lalana rehetra ireo na dia olo-masina, nahafoy ny zavatra rehetra, maty ho an'ny Tompo aza, dia miandry aloha . Izany hoe ny fidirana ao amin'ilay fanjakan'Andriamanitra dia miaraka daholo (Apok.20), misy ny toerana hiandrasana ho an'izay efa lasa nialoha lalana, paradisa hoy ny Tompo, ao anatin'ny fiainana feno fifaliana fa mbola tsy eo an-kavia sy an-kavanana akory. Fa rehefa tonga ny fotoam-pitsarana vao fantatra hoe i ranona no eo. Maninona moa no tsy ho ianao ?
Fa mety mahery ianao anio, fa mety ho tratran'ny fizahan-toetra rahapitso. Noho izany tsy mbola misy afaka ny hiteny hoe avelao itsy toerana itsy ho ahy dieny izao. Ny Tompo no efa niteny hoe
hanamboatra fitoerana ho anareo aho, izay hitoerako no hitoeranareo koa . Rehefa vita ny toerana ho anao, voalamina tsara ianao, voazaha toetra, voamboatra, dia alain'ny Tompo ianao fa ny antsipiriany dia Azy irery ihany. Nisy fanoharana nataon'i Jesoa izay hoe
ny fanjakan'Andriamanitra dia tahaka ny harato tarihina . Rehefa nosotomina ny harato dia teny amoron-dranomasina vao nofantenana ny trondro.
Ny tiana hambara dia hoe, tsy ny harato na ny fiangonana mihitsy no mifidy hoe merlan ihany no alaiko anio na sardine ihany . Tsy mifidy izany ny harato, tsy eny am-perinasa ny fifantenana. Tsy anjaran'ny fiangonana no milaza fa i rakoto dia lasa olo-masina eo ankavian'Andriamanitra. Indraindray ny fiangonana tratran'izany: i ranona dia tsy izy fa toa izao sy toa izao.
Tsia, tsy nirahina hifantina ny fiangonana na hanindraindra tena ho apostoly . Tsy asan'ny fiangonana izany, fa ho avy ny fotoan'ny fifantenana izay amin'ny faran'ny asa. Rehefa vita ny asa, voavory avokoa ny zavatra rehetra vao tonga eo amin'ny fotoan'ny fifantenana.
Mbola betsaka ny tiana hambara fa hajanoko hatreo aloha fa efa mahamonamonaina sahady ho an'ny hafa !
Hotohizana amin'ny manaraka ilay Mat.16:18 sy Mat.18:18
