Faly manoratra aminao indray ny tenako. Ny fahasoavan'i Kristy anie hamonto antsika indray ao anatin'izao hafatra izao.
Mipetraka amintsika ny fanontaniana: Velona ho an'ny inona isika? velona ho an'iza?
Amin'izao vanim-potoana iainantsika izao dia ny hohanina anio tadiavina rahampitso. Izany hoe, notrosaina ilay natao sakafo anio (ilay namahana olana) ary tadiavina rahampitso ny handoavana azy. Ny tiana hambara dia hoe: fotoana mahavery hevitra ny olona izao.
"Dia aza manahy hianareo ka manao hoe: Inona no hohaninay? na: Inona no hosotroinay? na: Inona no hotafianay? Fa izany rehetra izany dia katsahin'ny jentilisa fatratra; fa fantatry ny Rainareo Izay any an-danitra fa tokony ho anareo izany rehetra izany. Fa katsaho aloha ny fanjakany sy ny fahamarinany, dia hanampy ho anareo izany rehetra izany." Matio 6/31 - 33
Manoro antsika ary maneho safidy roa indray Jesosy eto: ny fanahiana ara-nofo sy ny fikatsahana ny fiainana mandrakizay.
Misy teny mampieritreritra ity:
"Fa izay mamafy ho an'ny nofony dia hijinja fahasimbana avy amin'ny nofo; ary izay mamafy ho an'ny Fanahy dia hijinja fiainana mandrakizay avy amin'ny Fanahy." Galatiana 6/8
Tsarovy fa ao amin'ny Fanjakan'Andriamanitra no misy ny fiainana mandrakizay. Isika no vahoaka ao amin'izany Fanjakana izany.
Mamporisika antsika hikatsaka ilay Fanjakana miantoka sy tsy mety potika mandrakizay Izy. Izany hoe, mitady fatratra izay fomba hiainana ny fiainan-danitra. Ny hany angatahana amintsika dia ny hiditra ao amin'izany Fanjakan'Andriamanitra izany. Ahoana nefa ny hidirana amin'izany Fanjakana izany? Olona manao ahoana no mendrika ny hiditra ao amin'izany?
Aoka isika handini-tena ka hilaza hoe: azoko antoka ve fa voavonjy aho? efa nateraka indray tokoa ve? Tena zanak'Andriamanitra ve aho? Toetran'Andriamanitra ve ity toetrako ity?
Raha zanak'Andriamanitra isika dia tokony hanaraka izay teneniny:
"Ny zanaka manaja ny rainy, ary ny mpanompo ny tompony; koa raha Ray Aho, aiza ary izay hajako? ary raha Tompo Aho, aiza izay tahotra Ahy? hoy Jehovah, Tompon'ny maro..." Malakia 1/6
Raha Andriamanitra no Raintsika dia tokony hanaiky sy hankato ny teniny, tokony handeha amin'ny fahamarinana sy ny fahamasinana isika.
Jesosy no làlana hidirana io Fanjakan'Andriamanitra io:
"Hoy Jesosy taminy: Izaho no làlana sy fahamarinana ary fiainana; tsy misy olona mankany amin'ny Ray, afa-tsy amin'ny alalako" Jaona 14/6 . Efa vitany ny famonjena antsika tamin'ny nandatsahany ny rany teo amin'ny hazofijaliana. Ny nangatahana tamintsika dia ny handray ny anjara famonjena efa vonona eo anoloantsika.
Ny famonjena dia ialohavana fibebahana, ialohavana fanapahan-kevitra hiala amin'ny ratsy fanao. Mibebaka = mahatsiaro tena fa tsy nety ny natao, miaky fa diso teo anatrehan'Andriamanitra.
Mipetraka indray ny fanontaniana: efa nibebaka marina ve isika? efa nialatsika tokoa ve ireo toetra tsy araka ny sitrapon'Andriamanitra?
Mandray famonjena = manaiky diovina amin'ny ran'i Jesosy, "
tena vonona" fa tsy hoe "
hiezaka" hiala amin'ny faharatsiana, manaiky hanoa (hanaiky) izay sitrapon'Ilay Ray Tsitoha.
Miara-manaiky isika fa sarotra ny hanatanteraka izany. Alao hery ry havana malala, ary
"miseseha hiditra amin'ny varavarana èty hianareo; fa hoy Izaho aminareo: Maro no hitady hiditra, fa tsy ho afaka" Lioka 13:24.
Voalaza fa rombahana ny Fanjakan'ny lanitra, koa noho izany midira amin'Ilay vavahady dia Jesosy izany. Hoy Izy:
"Izaho no vavahady; raha Izaho no hidiran'ny olona, dia hovonjena izy ka hiditra sy hivoaka sady hahazo hanina." Jaona 10/9.
Mbola misokatra "Ilay Vavahadin'ny fiainana mandrakizay" ary hirindrina (hikatona) Izy satria efa andro farany izao. Fantaro ry havako malala fa efa miseho daholo ny faminaniana ao anaty baiboly ny amin'ny andro farany.
Koa eto am-pamaranana, tsarovy ny famonjena nomen'Andriamanitra antsika. Fotoana izao hiainana sahady ny fiainan-danitra (ety an-tany tahaka ny any an-danitra). Tsarovy fa amin'ny alalan'ny fanazaran-tena no ahafahan'ny mpihazakazaka manomana ny fandreseny. Toa izany koa ny fandrombahana ny loka dia ny "satro-boninahitra fiainana", ny fotoana omena iainantsika ety an-tany no fotoana iomanana handovana ny fiainana mandrakizay.
Aoka ho tsara sy araka ny sitrapon'Andriamanitra ny toetratsika, aoka isika handeha amin'ny fahamarinana sy fahamasinana fa izany no fanomanantsika ny mandrakizaintsika.
Hafatra: Izay ataoko sy izay safidiko no mamaritra ny mandrakizaiko.
"Fa raha velona isika, dia velona ho an'ny Tompo; ary raha maty isika, dia maty ho an'ny Tompo; koa amin'izany, na velona na maty isika, dia an'ny Tompo ihany" Romana 14/8
Aoka ho an'Ilay Rain'ny mandrakizay ny dera sy ny haja ary ny voninahitra faratampony. Aleloia
