Ity dia ho an'i Rakaroka izay nanontany ny momba an'Andriamanitra tamiko. Santatra fotsiny ity fa mbola be ny tohiny fa lava loatra azafady indrindra. Nomeko hevitra vaovao satria afaka manampy izay tsy ampy ny rehetra, amin'izay mba hazava kokoa izya moa ilay Andriamanitsika Kristianina.
Iza moa Andriamanitra?
Hatramin'izay nisian'ny olombelona dia efa nitady sy nikatsaka foana ny fahalalalana ny fahamarinana momba an'Andriamanitra isika. Ny anton'izany dia noho isika nohariany ka nomeny ny fanahy izay tsy mitsahatra mitady hanantona azy sy hiresaka aminy.
Iza tokoa moa Andriamanitra? afaka mifandray amintsika (olombelona) ve izy ary inona no fikasany momba ny antsika? Raha Kristianina ny olona iray dia ny baiboly no toerana alehany voloahany hamantarany izany Andriamanitra inoany izany. Ny antony dia satria io no resaka ifandraisan'Andriamanitra amin'ny zanany ary nomeny tamin'ny alalan'ny faminaniana sy nivoaka tamin'ny vavany Zanany lahitokana, dia i Jesoa.
Amin'ny fanombohan'ny boky Genesis dia natsoina hoe "Elohim" na Ilay Nahary aloha izy ary natao hoe " Adonai Elohim" Andriamanitra Andriananahary satria "Adonai" no tena anarany fa Elohim kosa dia milaza ny voninahiny.(Teny Hebreo ireo nalaina tao amin'i Genesis Hebreo tenin'i Moizy). Avy eo nisy koa ny " El Elyon" (Andriamanitra avo indrindra), ny "El Shaddai (God Almighty) ary farany nilaza ny anarany izy tamin'i Moizy ka nantsoina hoe "Yahveh" na "Jehovah" izy (Eksodosy 3:14).
Raha zohina tokoa ny baiboly dia misy endrika samihafa no ifandraisan'Andriamanitra tamintsika zanany arakaraky ny vanim-potoana sy ny izay zavamisy mitranga ka tiany ifandraisana amintsika. Fa Andriamanitra dia iray ihany.
Tamin'ny andron'i Mosesy dia Izy ilay Ray any an-danitra, nihary an'izao tontolo izao noho izany ambony indrindra noho izao rehetra izao ary tsy hita maso sy tsy hay eritreretina. Ny vahoakan'Israel no nofidiany tamin'izany.
Toy ny ray mikarakara ny zanany no nikarakarany ny zanak'Israel. Ka na tsy hita maso aza izy dia ny vokatry ny asany kosa dia mahery. (Eksodosy 19:9) " Ary hoy i Jehovah tamin'i Mosesy: Indro Aho mankeo aminao ao anaty rahona maizina. Mba ho ren'ny olona raha miteny aminao Aho, ka dia hino anao mandrakizay izy." Izy no manome ny didy sy lalana arahin'ny Olony ary mametraka azy ho "Moral God" zany hoe Andriamanitra mitaky ny fahamarinana sy fahamasinana. Ohatra (Deoteronomia 5:15)" Ary tsarovy fa andevo tany amin'ny tany Egypta ianao, ka tanana mahery sy sandry nahinjitra no nitondran'i Jehovah Andriamanitrao nivoaka avy tany; izany no handidian'i Jehovah Andriamanitrao ny hitandrina ny andro Sabata."
Taty afaran'io anefa dia nanapakevitra Andriamanitra fa hamela ny zanak'Israely ho hahaleo tena amin'izay ka mba ho matotra satria hatramin'izay dia nokenakena foana tokoa toy ny zaza ity firenena ity. Nnadika lalana matetika tokoa ny zanak'Israely ary nalahelo Andriamanitra saingy tsy navelany ho irery izy fa efa nonomana fahasaoavana hafa indray ho an'ny zanany.
Eny na tsy niseho mivantana ny fifandraisany tamin'ny olombelona Izy dia miahy sy nampanantena fitohizan'ny fahasoavana kosa Izy ny eto ambon'ny tany. Noho izany fitiavan'Andriamanitra tsy manampetra izay dia nampanantena ny Mesia izy hitondra fanavotana ho an'ny zanany (Mika 5:1) "Fa ianao ry Betlehema Efrata, izay kely tsy tokon'ny ho isan'ny arivon'ny Joda akory, dia avy ao aminao no ivoahan'Izay iray no Mpanampaka ho Ahy amin'ny Isralely. Hatry ny fahagola no efa nivoahany, dia hatrizay hatrizay." (Jaona 1: 1) "Tamin'ny voalohany ny Teny ary ny Teny tao amin'Andriamanitra, ary ny Teny dia Andriamanitra." Eto milaza fa Andriamanitra dia ilay Teny. (Jaona 1:14) "Ary ny Teny dia tonga nofo ka nonina tamintsika; ary hitanay ny voninahiny, dia voninahitra miendrika ho an'ny Lahitokana avy tamin'ny Ray, sady feno fahasoavanasy fahamarinana." (Jaona 1:17-18) " Fa ny lalana dia nomen'ny Moizy; fa ny fahasoavana sy ny fahamarinana kosa dia tonga tamin'ny alalan'i Jesoa Kristy. Tsy nisy nahita na oviana na ovina an'Andriamanitra fa ny Zanaka Lahitokana, Izay ao an-tratran'ny Ray, Izy no hanambara Azy." Nizara ny fitiavany sy ny fahasoavany tamintsika rehetra Andriamanitra eto na dia tsy zanak'Israley aza isika. (Jaona 1:9-13) Hitondra fahazavana ho antsika i Kristy satria tao anatin'ny aizin'ny fahotana isika hatramin'izay. "Tao ny tena Mazava Izay manazava ny olona rehetra tonga amin'izao tontolo izo. Teo amin'izao tontolo izao Izy, ary Izy no nanaovana an'izao tontolo izo, nefa izao tontolo izo tsy nahalala Azy. Tonga tany amin'ny Azy Izy, fa ny Azy tsy nandray Azy. Fa izy rehetra nandray Azy dia nomeny hery ho tonga zanak'Andriamanitra, dia izay mino ny anarany, dia ireo izay tsy nateraky ny ra, na ny sitrapon'ny olona, fa naterak'Andriamanitra." Ny naterak'Andriamanitra dia ny teraka tamin'ny Batisa. Nitondra ny Batisa amin'ny Fanahy Masina izy hanome fanazavana sy famonjena ny fanahintsika. (Marka 1:8) " Izaho nanao batisa anareo amin'ny rano fa izy kosa hanao batisa anareo amin'ny Fanahy Masina." Fa i Jesoa kosa dia nomelohan'ny zanak'Israely noho ny tsy fahalalany ny tenin'Andriamanitra. Tsy kivy anefa Andriamanitra fa nanome ny Fanahy Masina hidina ety hamintsika ho solon'ilay lasa. (Asan'Apostoly 2:36-39) " Koa aoka ho fantatry ny taranak'Israely rehetra marimarina, fa iny Jesoa nohomboanareo tamin'ny hazo fijaliana iny dia efa nataon'Andriamanitra ho Tompo sy Kristy. ....Ary Petera taminy: Mibebaha, ary aoka samy hatao batisa amin'ny anaran'i Jesosy Kristy hianareo rehetra mba hahazo famelana ny helokareo; ary hianareo handray ny Fanahy Masina; fa ny teny fikasana dia ho anareo sy ny zanakareo ary ho an'izay rehetra lavitra, na iza na iza hantsoin'i Jehovah Andriamanintsika hanatona Azy."(Asan'Apostoly 2:4)" Ary samy feno ny Fanahy Masina izy rehetra, ka dia niteny tamin'ny teny maro samihafa, araka ny nampitenenan'ny Fanahy Masina azy." Ary izao no teny fikasana izay andraindrain'ny maro. (Jaona 6:40) "Fa izao no sitrapon'ny Raiko, dia ny hahazoan'izay rehetra mino ny Zanaka ka mino Azy fianainana mandrakizay; ary Izaho hanangana azy amin'ny andro farany."
