RADO , poeta feno sy manan'amby: karazan-tononkalo maro no voasora-dRado.Sehatra tsy voafetra no hianahan'izany.Fo , saina , vatana , fanahy tsy voaisa no iantefany.Tsy nahitana trangan-javatra navahana manokana i Rado teo amin'ny sanganasany fa rehefa fantany fa ilain'ny mpiara-belona aminy ny famoahana azy ireny " nikorisa ny peniny ".Izany no ilazana fa poetan'ny vahoaka izy.Tsy mijanona hatreo amin'ny talaky maso anefa i Rado fa mamoaka ny ambadika ihany koa.Endrika samihafa no hanehoany izany , fa ny iraisanireo , notandrovany mafy ny maha kanto ny asa sorany , ary izay no heverina fa nahatonga azy ireny tsy ho afaka am-po sy am-bavan'ny rehetra.Nanamafy izany rahateo ny filàn'ny vahiny ny sanganasany ka nahatonga azy hanao ilay boky " Fiteny roa " .Ny fanetsehana ny fananan-karenan'ny teny malagasy nataon-dRado no nahatonga izany.Sehatra maro no niantefan'izay fahavitrihana izay indrindra teo amin'ny fampianarana sy ny fikarohana.Nampihavaka azy koa ny fampitohizana ny lasa sy ny ankehitriny ary ny ho avy.Fitsinjovana ny taranaka aty aoriana avokoa ireny.Asa raha fantatrao fa vao nivoaka an-gazety ny " Raha mbola misy " , tononkalo nosoratan-dRado , dia vitan'i Bessa avy hatrany ny feony , ary dia tsy afaka am-bavan'ny rehetra am-polotaona aty aoriana.Ny antony?Tafaray ny samy kanto.
Tafiditra ao anatin'ny "Lohataonan'ny Poeta " ny "Rado manontolo ".Fanehoan-kevitra nataon'ireo mahafantatra an-dRado , teo anivon'ny fiarahamonina sy ny tontolon'ny soratra.Anisan'izany i Bessa izay namadika ity tononkalo ity ho hira ka tsy afaka am-bavan'ny maro hatramin'izao:
Raha mbola misy
Raha mbola misy tsiky
Azonao hasetra ny ronjon'ny ankaso ,
Nahoana indrindra , iky
no dia laniana foana ny vongan-dranomaso
Raha mbola misy ihany
kintana mamiratra azonao banjinina ,
Nahoana no tomany
no andanianao ny alin'ny ririnina ?
Raha mbola misy kalo
Azonao hiraina anaty fahavaratra
Nahoana no himalo
Mahita vodilanitra mosarena taratra ?
Rado( Dinitra 24/02/70)
HaRy Razafindrakoto tao amin'ny gazety Taratra faha-0627
