Tsy misy tompoko ny fahagagana fa izay nafafy ihany no jinjaina.
Nanoman-tena sy nandranto lalao tamin'i Frantsa (tompon-daka eran-tany 1998) sy Danemark ( tompon-daka eropeana 1992) ry zareo. Resy tamin'ny isa mavesatra (5-0 sy 4-0), faharesena mangidy indrindra ho azy mianakavy koa iny nandresentsika azy tetsy Mahamasina iny. Saingy hainy ny naka lesona sy nanarina ny fahavoazany.
Tsy azo lavina fa Ejipta inefatra tompon-dakan'i Afrika, manana club goavana toy ny Zamalek, Ahly, Masry, sy ny sisa.
Nifehy tanteraka ny lalao ny ejipsiana nandritra iny fihaonany tamin'ny malagasy iny. Iza no sahy mandà an'izany?
Niezaka ny malagasy nanao izay farafahaizany ary tsy manome tsiny an'ireny mpilalaontsika ireny isika satria nanao izay faraheriny tokoa izy ireo. Sendra ny mafy noho izy ireo ka tsy afa-nanoatra e.
Eo ambony kianja tompoko no milalao fa tsy vitan'ny nofinofy sy torapo fotsiny akory. Isika malagasy tena diso satria nanonofinofy fotsiny sy nanantena ny handresy mora ny ejispiana.
Ny baolina miditra any anaty harato ihany no isaina.
Amiko dia samy manana ny andraikiny tamin'iny faharesena iny ny tsirairay. Tsy vitan'ny vonjy tavanandro sy ny petatoko akory ny fanomanana ny fiatrehana lalao iraisam-pirenena fa aman-taonany maro. Tsy vitan'ny hoe rahampitso ianao hilalao dia anio vao mikorapaka. Tsy misy ny rafitra mazava itantanana ny baolina kitra fa mifanipaka toy ny valala an-karona no ataon'ireo mpitantana.
Gidragidra lava ny an'ny ministera sy ny federasiona. Hatramin'ny sakafo hanin'ny mpilalao no arahin'alahelo sy hiakatra fitsarana eny @ tribonaly. Inona no zavatra ho vanona amin'izany?
Ny an'ny olona manomboka any amin'ny sokajy madinika indrindra "poussins "dia efa misy fifaninanam-pirenena. Ny antsika aza ny championnat mbola élimination direct fa tsy mba mandeha journées ohatra an'ireo firenen-kafa, na dia ireo tany mahantra atsy Afrika aza.
Raha resaka vola tsy misy sy ny fahantrana indray dia tsy fialan-tsiny izany tompoko ô. Misy ny vola tompoko fa lalan-kafa no alehany. Mahantra ny zambiana kanefa maninona no anisan'ireo sangany aty Afrika?
Raha sanatria ka isika no nitrangan-javatra toy ny nanjo ny zambiana tamin'ny taona 1992 ireny dia nandao ny fifaninana. Ekipa iray no indray maty nivarina any an-dranomasina. Ringana tsy nisy niangana izy rehetra kanefa mbola tody tany amin'ny lalao famaranana ihany.
Amiko dia misy ny vola natokana ho an'ny kitra fa tsy mandeha amin'ny tokony ho izy. Natao aiza ny volan'ny FIFA GOAL?
Ny tokony hataontsika dia mikolokolo ireo zaza manan-talenta, atomboka any amin'ny sekolin'ny baolina kitra any Antsirabe. Manomboka any amin'ny fokontany ny fifaninana, mitohy amin'ny section, ligy ary miakatra eo amin'ny sehatra nasionaly. Karakaraina sahady dieny izao ireo ankizy madinika toy ny AJESAIA dia ny lavitrezaka , toy ny any amin'ny fiadiana ny tompondaka erantany amin'ny 2010 no omanina dieny izao sahady.
Mba mitsinjo lavitra sady mandray andraikitra fa tsy miaina amin'ny vonjy tavanandro sy ny petatoko lava izao. Izay no fampandrosoana maharitra.
Vita tompoko.
