Napetrako eto ny angano mba hiresahantsika ny zavatra manitikitika antsika momba ny fampirafesana ary koa ny fomba fijerena ny zavanisy tao anaty angano. Azontsika fakafakaina io angano io. Misaotra indrindra.
Toy izao ny nahatonga ny lehilahy hampirafy.
Nisy vehivavy roa mirahavavy izay tena mpamboly be. Nisy koa tamin’izany fotoana izany lehilahy iray tsy nahavita namboly, ka ny fangalarana ny volin’ireto vehivavy ireto no raharaha nataony.
Nony ela dia tsikaritr’ireto vehivavy mpamboly fa misy mpanagalatra isan-kariva ny voly izay ataon-dreo. Dia gaga izy roa vavy fa tsy hitan’izy ireo ny olona mba misodisodina eny manodidina eny manongotra ny voliny. Dia niara-nidinika izy roa vavy ka tapaka fa handeha hiakatra any amin’ny Zanahary.
Dia tonga eo amin’ny Zanahary ireo ka nitaraina manao hoe « Izahay, Ranandria, vizaka mamboly, nefa misy mpanongotra, inona no hataonay?»
Namaly azy ireo Zanahary manao hoe:»Lehilahy tsy mahavelon-tena no manongotra ny volinareo io, ka mamboara trano ianareo raha efa mahavita ianareo dia miakara eto amiko indray.»
Dia niverina izy roa vavy ary nanatanteraka ny nasain’I Zanahary nataony. Vita koa ilay trano, ary nasain’I Zanahary nasiana varavarana matanjaka. Rehafa vita izany dia hoy i Zanahary hoe :» Halatsako ny orana, ka rehefa latsaka be ny orana, miala tao an-trano ianareo, isio hanina masaka ho tratrany ny ao an-trano ao, fa raha mangatsiaka izy dia hiditra ao ka hihinana. Ka raha hitanareo izy miditra ao, arindrino ary hidio ny varavarana ka mandehana eto amin’izay ianareo.»
Nirotsaka be ny ranon’orana ary niala tao an-trano ireo vehivavy. Kotsa sy nangatsiaka ilay lehilahy, ka niditra tao an-trano, dia nahidin’izy ireo teo. Dia nandeha amin’izay izy roa vavy tany amin’I Zanahary. Dia hoy I Zanahary :» Ao ve izy, niditra ao an-trano ao?» «Eny, voahidy ao izy» hoy ireto.
Nidina amin’izay Zanahary miaraka amin’ireto vehivavy roa. Nony tonga teo an-trano izy ireo dia nosokafana ny varavarana ka nanontany an’ilay lehilahy Zanahary « Inona no antony angalaranao ny hanin’ireto vehivevy ireto?» Namaly ilay lehilahy hoe « Izaho mosarena.»
«Ka maninona ianao tsy manboly. Vehivavy aza ireto nefa mamboly. Ka ianao lehilahy no tsy mamboly.» Hoy Zanahary. «Tsy mahavita aho» hoy ny navaliny. Dia hoy I Zanahary« Voasazy ianao. Manomboka androany ary manomboka aminao ka hatramin’ny taranaka dia tsy maintsy manonitra ny hanin’ireto vehivavy ireto ianao, ka izay zavatra hitanao tsy maintsy omenao ny vehivavy ireo.» Izay no niatombohan’ny «tangy». Niteny amin’izay ireto vehivavy ireto manao hoe:
« Izahay, Ranadria, tsy mangala ny didinao, fa tsy maintsy miharo aminay izy.» Dia neken’I Zanahary ny fangatahan-dry zareo.
Samy niara-nonina tamin’io trano iray io izy telo. Ny zoky olona amin’izy roa vavy no niseho ho lehibe tao. Matetika dia io zoky olona io ihany no miharo lamba amin’ilay lehilahy voasambotra. Na dia mandeha an-taninm-boly dia ilay zoky olona ihany no mampiasa ny lehilahy.
Nalahelo ny zandry olona ka nandeha nitaraina any amin’I Zanahary any. Tonga tao dia izao no nolazainy:» Izaho mitaraina aminao eto, fa ny zokiko ihany no miharo safotra sy mampiasa ny lehilahy voasambotra iny, nefa ny voly nangalarin’io lehilahy io dia anay roa.» Namaly I Zanahary hoe :» Marina izany, mamboara trano atsimo eo koa ianao, ka rehefa vita io dia miverana aty indray.»
Dia nanamboatra an’io ilay zandry olona ka vita. Niakatra any amin’ny Zanahary izy dia niara nidina taminy I Zanahary rehefa avy eo. Hoy Zanahary tamin’ny zoky olona :» Avy eto aho satria tonga tao amiko ny zandrinao mitaraiana fa ianao ihany no miharo lamba ary mampiasa ny mpangalatrareo. Ka androany izy dia aminao ato, rahampitso izy amin’ny zandrinao ao. Ka ianao lehilahy tandremonao tsy hodisoinao ny andro omena anao io.»
Dia tonga vadin’ilay lehilahy izy roa vavy. Ary nanomboka tamin’izay ny fampirafesana.
Raha ny tena fomban-drazana dia ny «valibe» no maka vehivavy ho rafiny raha toa ka tsy miteraka izy mba hananan’ilay vadiny zanaka. Tsy izany intsony ny fipetrany amin’izao fotoana izao fa manjary «hatea raha», ka rehefa mahita vehivavy tiany ny lehilahy dia mampirafy.
Nangonin’I P. Luigi ELLI cm Fomba Bara 1999.
