hummmm ! mba diniho kely ange ity eh !
Voasoloky nividy tanin’olona: 270 000 000 fmg no very
Mafy ny nanjo an’ity vehivavy iray mba nirahin’ny anadahiny monina any am-pita hividy tany, tamin’ny taona 2002. Niresadresaka tamin’ny tapaka sy namana ary ny manodidina àry izy ka nilaza fa mitady tany hovidiana.
Rehefa niely ny resaka dia nisy mpanera antsoina hoe R. Patrick Marcel, tonga nanatona an’ilay vehivavy izay nitady tany. Nitondra taratasy maromaro mikasika ny tany iray eto Antananarivo izy tamin’izany ary nilaza tamin’ilay ramatoa fa amidy izany tany izany. Rehefa vita ny resaka sy ny ady varotra dia niroso tamin’ny fombafomba fanao rehetra amin’ny fifampivarotana izy ireo. Teny antenantenany teny aloha dia efa somary tsikaritr’ilay mpividy fa toa misy zavatra somary hafahafa satria toa nivezivezy ihany izy ireo tamin’ny fikarakarana ny taratasy. Teo am-panaovana ny famindrana ny anaran’ny tany tamin’ilay mpividy, na ny « mutation » izay vao tena hita fa hosoka ny taratasy mikasika ilay tany. Ny tena marina mantsy dia vazaha no tena tompon’ny tany, saingy tsy io tena tompony io no nanao ny fivarotana ny tany fa olon-kafa no nanaovana kara-panondro sandoka ka nasolo azy. Izany hoe teo no tena fototry ny raharaha satria karazan’ny nangalatra tany ihany izany ry zalahy ireto. Tsy azy akory ny tany, nefa nisandoka ho tompony izy ireo ary nivarotra ilay tany an-tsokosoko, tsy fantatry ny tena tompony akory. Voampanga noho izany i Patrick sy ny namany iray tamin’ny fanaovan’izy ireo taratasy hosoka nentina nivarotana tanin’olona. Tao anatin’ny fifandaharana teo anoloan’ny fitsarana dia toa hita taratra ihany fa nataon’ilay Patrick fitaovana ity namany iray ity, ka toa hoe nampitahoriny hotoriana raha tsy mety manaraka ny teniny amin’ny fanatanterahana ny varotra tsy mazava. Izy rahateo moa efa tafiditra ihany noho ny nanekeny nanome sary hanaovana kara-panondro sandoka mba hahafahana manatanteraka ny varotra. Raha ny vola azon’ity naman’i Patrick ity aloha dia azo lazaina ho kely ihany miohatra amin’ny vidin’ ny tany izay 270 000 000 fmg, araka ny efa voalaza etsy ambony, ary nilaza izy teo anoloan’ny fitsarana fa dia tafiditra lalina tamin’ny tsy fidiny, fa noho izy norabirabiana tamin’ny vola fotsiny ihany no naha latsaka azy tao anatin’izany fahambaniana izany. Na dia ilay ramatoa nitory tamin’ity raharaha ity aza dia nilaza mazava fa tsy dia nisy nidiran’ilay naman’i Patrick loatra tamin’ny raharaha fa karazana olona nindramina fotsiny ihany izy io mba hanatanterahana ny varotra, fa io Patrick io no tena rangory fototry ny afo ary nanao ny taratasy sy ny fifanarahana rehetra taminy. Ny fampanoavana aloha dia nahatsapa fa nisy tokoa ny fanaovana hosoka tamin’izao raharaha izao ka nahita fa meloka tokoa i Patrick sy ny namany. Ny fitsarana kosa dia nanavaka tsara, noho ny fahatsapany fa ilay Patrick io no tena tompon’antoka sy tena ati-doha tamin’ny raharaha. Noho izany dia nosaziany higadra herintaona an-trano maizina ilay naman’i Patrick izay nataony fitaovana ka nampanaoviny kara-panondro sandoka, miampy fandoavana onitra 15 000 000 fmg amin’ilay ramatoa mpitory sady nagaïka onitra. Ho an’i Patrick izay tsy niseho teo anoloan’ny fitsarana kosa, dia namoahany didy fampisamborana ka nosaziany 3 taona an-trano maizina, miampy fandoa- vana onitra 255 000 000 fmg amin’ny mpangataka izany.
