Mifindra kely indray isika. Inoako fa toa izao daholo ny ankamaroan'ny ambanivohitra ao Madagasikara. Rehefa tonga amin'ny toerana hafa (Renivohitra na andafy) dia miova tanteraka ilay fomba.
Ny any amin'ireny ambanivohitra ireny an, arahabaina daholo ny olona rehetra mifanena amin'ny tena... na dia tsy fantatra aza. Ohatra hoe avy ao aminay (Antanisoa, akaikin'i Mamoeramanjaka, firaisan'i Morafeno, Fivondronan'Arivonimamo :D ) ka mandeha miantsena (lalana 15 km raha kely indrindra) dia rehefa misy mifanena aminao dia arahabainao... "Manahoana eee"... dia mamaly hoe "Tsara fa misaotra, nareo no manao ahoana?" dia valiana hoe "Salama"... Izany rehetra izany dia atao amin'ilay mifanena iny fa tsy voatery mijanona. Raha mifankafantatra dia mijanona sy mifanatsara mihitsy. Tsy mikaonty io na impiry mifanena na impiry.
Raha ohatra ka alavidavitra ilay olona dia mikiakiaka mihitsy miantso hoe "Manahoana eeee"... dia mitovy amin'ilay teo ihany fa ny feo no atao avoavo.
Raha mipetraka indray ny iray na tsy mihetsika... na dia alavitra aza (50 m) ka takatry ny feo dia miteny hoe "Azafady eee" dia mamaly ny iray hoe "Ndao ooo" :-) tsy mikaonty koa hoe i leiry io ve mipetraka andalana sa sns...
Farany raha misakafo ianao no misy olona mandalo, na eny amin'ny 50 m aza izy no mandalo (raha mbola takatry ny feo) dia miantsoantso hoe "Manasa hisakafo eee"... dia ilay mandalo miteny hoe "Misaotra kouuu"... raha ohatra ka manatona tampoka ilay olona asaina (rehefa manadala olona aho dia tonga tokoa) dia tsy maintsy omena amin'izay anananao eo... Ny olana fotsiny dia tsisy sotro na lovia hafa eo fa dia miray sotro ( 8-) ) sy miray lovia.
Izany no fomba any ambanivohitra isankarazany ao Dago... rehefa tonga @ toerana hafa dia manjavona daholo izany. Tsy mifampiarahaba na dia mpiray vodirindrina aza. Tsy mamoha trano rehefa misakafo na dia misy namana tonga aza. Tsy manao azafady na dia efa hanitsaka izao aza... Niova tokoa ramalagasy.
