Iza moa ny atao hoe zanak'isiraely???
Iza i Isiraely? « Ary hoy indray Izy: Tsy hatao hoe Jakoba intsony ny anaranao, fa Isiraely; satria efa nitolona tamin'Andriamanitra sy tamin'ny olona ianao ka nahery. » (Genesisy 32:29)
I Jakoba no atao hoe Isiraely. Ny atao hoe zank'israely araka izany dia ireo taranak'i Jakoba,
Ireo didy v natokana ho an'ny taranak'i Jakoba ihany marina tokoa????
Talohan'ny taranak'i Jakoba dia efa nisy olona maro, nampianarin'Andriamanitra ireo didiny ireo saingy tsy noraiketina antsoratra ireny didy ireny tamin'izany fotoana izany fa mbola nomena ambava fotsiny ihany....
Ireny olona ireny dia nifanerasera tamin'Andriamanitra ary nampianariny ireo didiny
Anisan'izany i Enoka izay voalaza fa "tsy hita" (nanjavona) satria nentin'Andriamanitra rehefa niara-nandeha taminy (nitandrina ny didiny no tiany ambara eo)....« Ary niara-nandeha tamin'Andriamanitra Enoka; ka tsy hita izy, fa nentin'Andriamanitra. » (Genesisy 5:24)
I Abrahama koa dia anisan'ny nampianariny sy nampitandremany an'ireo didy ireo....« satria efa nihaino ny feoko Abrahama ka nitandrina izay nasaiko notandremany, dia ny didiko sy ny teniko ary ny lalàko. » (Genesisy 26:5)
Talohan'ny zanak'israely dia efa nifidy mpisorona koa Andriamanitra : Melkizedeka no anarany, « Ary Melkizedeka, mpanjakan'i Salema, nivoaka nitondra mofo sy divay; ary izy dia mpisoron'Andriamanitra Avo Indrindra. » (Genesisy 14:18)
Tsy hoe taorian'ny fanomezana ny didy folo vao nampianarin'Andriamanitra ireo didy ireo fa talohan'izay dia efa nampianariny an'ireny olona ireny.
1 Ny fitandremana (fitsaharana) amin'ny andro fahafito IZY mihitsy no nampianatra ny fitandremana sy ny fanamasinana izany voalohany indrindra....
« Ary tamin'ny andro fahafito dia vitan'Andriamanitra ny asa efa nataony; ary dia nitsahatra tamin'ny andro fahafito Izy tamin'ny asany rehetra izay efa nataony. » (Genesisy 2:2)
« Ary Andriamanitra nitahy ny andro fahafito sy nanamasina azy, satria tamin'izany no nitsaharan'Andriamanitra tamin'ny asany rehetra izay noforoniny tamin'ny nanaovany azy. » (Genesisy 2:3)
Raha mbola tsy azo koa ny didy folo dia efa nampianarina tany an'efitra ny fitandremana ny andro fahafito....« Henemana no hanangonanareo azy; fa Sabata ny andro fahafito, ka dia tsy hisy amin'izany. » (Eksodosy 16:26)
2 Tamin'ny andron'i Noa ohatra koa ohatra dia efa nampahafantarina tsara ny olona ny atao hoe biby madio sy ny biby tsy madio....« Ny biby madio rehetra isan-karazany dia hanalanao ho ao aminao fito avy, lahy sy vavy; ary ny biby tsy madio isan-karazany roa avy, lahy sy vavy; » (Genesisy 7:2)
3 Ny fahafolonkarena dia tsy hoe didy vaovao nomena ny zanak'isiraely fa efa nampianarina an-dry Abrahama sy ry Melkizedeka ihany koa....« Ary Melkizedeka, mpanjakan'i Salema, nivoaka nitondra mofo sy divay; ary izy dia mpisoron'Andriamanitra Avo Indrindra. » (Genesisy 14:18)
« Dia nitso-drano azy Izy ka nanao hoe: Hotahin'Andriamanitra Avo indrindra anie Abrama, dia Andriamanitra Izay nahary ny lanitra sy ny tany; » (Genesisy 14:19)
« Ary isaorana anie Andriamanitra Avo Indrindra, Izay efa nanolotra ny fahavalonao teo an-tananao. Dia nomen'i Abrama azy ny ampahafolon'ny zavatra rehetra. » (Genesisy 14:20)
I Jakoba koa dia efa nampahafantarina ny didy momba ampahafolony...« Dia nivoady Jakoba ka nanao hoe: Raha homba ahy Andriamanitra ka hiaro ahy amin'izao lalana alehako izao, ary hanome ahy mofo hohaniko sy lamba hitafiako, » (Genesisy 28:20)
« ka ho tafaverina soa aman-tsara any amin'ny tranon'ny raiko aho, dia Jehovah no ho Andriamanitro, » (Genesisy 28:21)
« ary ity vato izay naoriko ho tsangam-bato ity ho tranon'Andriamanitra, ary izay rehetra homenao ahy, dia homeko Anao tokoa ny ampahafolony. » (Genesisy 28:22)
Fehiny : tsy ny israelianina ihany no afaka manompo an'Andriamanitra fa ireo hafa firenena dia afaka manompo Azy tsara mihitsy....
