Manolotra ny arahaba ary manonona ny Fiadanan'i Kristy ho amintsika rehetra.
Toetra takiana ary didy nomen'i Kristy antsika ny fitiavana na ny fifankatiavana. Mampianatra antsika hitia an'Andriamanitra sy ny olombelona (mpiara-miaina amintsika) ny baiboly. Aiza ho aiza nefa ny fototra?
Velom-panontaniana ny apôstôly Paoly:
"Iza no hahasaraka antsika amin'ny fitiavan'i Kristy? Fahoriana va, sa fahantrana, sa fanenjehana, sa mosary, sa fitanjahana, sa loza, sa sabatra? " Romana 8/35.
Ny zava-miseho dia mety hahatonga antsika hitia na hankahala zavatra iray. Mety ho toa izany koa ny miaraka amin'Andriamanitra. Rehefa mandinika ny fiainantsika isika dia ifandimbiasan'ny olana sy ny fiadanana foana. Ireo tranga eo amin'ny andavanandrontsika dia mety mitarika antsika hametra-panontaniana hoe "tia ahy marina ve Andriamanitra?", "nahoana no toa izao no niseho fa tsy ilay nantenaina?" . Mety hisarika antsika ihany koa hanadino ny Fitiavan'Ilay Avo indrindra antsika, ohatra, rehefa ao anatin'ny fiadanana.
Anio, ry havana malala, mampatsiahy sy mampahery antsika ny Tenin'Andriamanitra fa tena tia antsika Izy. Tsy misy isalasalana izany fa hoy Izy:
"...Fitiavana Mandrakizay no nitiavako anao..." Jeremia 31/3.
Izany hoe, tsy manam-pahataperana ilay Fitiavany antsika ary mitaona antsika hanary ny fisainana mifanohitra amin'izany.
Rehefa dinihina ilay fanontanian'i Paoly etsy ambony dia toa mamporisika antsika hijanona ka handinika tsara hoe: inona no lehibe ao am-potsika? inona no imatimatesantsika? miala sy miongotra amintsika ve ny Fitiavan'i Kristy raha iharan-javatra isika? (raha araka ny fijery maha olombelona dia zavatra ratsy no voatanisa eo: fahoriana, fahantrana...).
Fantaro fa n'inon'inona mihatra amintsika, n'iza tia na tsy tia antsika, na ahoana na ahoana fitrangan'ny toe-javatra eo amin'ny fiainantsika, n'aiza n'aiza misy antsika ary na oviana na rahoviana dia tena tia antsika Andriamanitra:
"Fa toy izao no nitiavan'Andriamanitra izao tontolo izao: nomeny ny Zanani-lahy Tokana, mba tsy ho very izay rehetra mino Azy, fa hanana fiainana mandrakizay.
Jaona 3/16;
"Fa Andriamanitra mampiseho ny fitiavany antsika, fa fony mbola mpanota isika, dia maty hamonjy antsika Kristy" Romana 5/8.
"Tsy misy manana fitiavana lehibe noho izao, dia ny manolotra ny ainy hamonjy ny sakaizany. Hianareo no sakaizako, raha manao araka izay andidiako anareo." Jaona 15/13 - 14. Efa nasehon'i Jesosy izany Fitiavan'Andriamanitra antsika izany: nanolotra ny ainy Izy ho famonjena antsika.
Koa ankehitriny, manàna toky ekeo amin'ny fo rehetra fa tena tia antsika mandrakariva i Jesosy.
Inona no havalintsika izany?
Misy ohabolan'ny ntaolo Malagasy manao hoe:
"Ny fitia mifamaly mahatsara fihavanana". Koa ndeha, ry havana malala, hamaly izany Fitiavan'Andriamanitra izany ka hanambara amin'ny fotsika sy ny fanahitsika manontolo fa tena tiantsika ihany koa Andriamanitra, tiantsika ny fitondrany sy ny fitatantanany, mahafa-po antsika izay efa nataony tamintsika ary tsy hiala Aminy mandrakizay ihany koa isika.
Ndeha hanolotra ny amintsika manontolo ho Azy ihany koa isika, hatramin'ny foronana kely indrindra ao anatitsika ka hatram'izao hita maso izao.
Ahoana nefa izany hoe tia sy manolo-tena izany?
"Jesosy namaly ka nanao taminy hoe: Raha misy tia Ahy, dia hitandrina ny teniko izy; ary ny Raiko ho tia azy, ary hankao aminy Izahay ka honina ao aminy. Izay tsy tia Ahy dia tsy mitandrina ny teniko; ary ny teny izay renareo dia tsy Ahy, fa an’ny Ray Izay naniraka Ahy." Jaona 14/23 - 24.
Hafatra :
"Fa matoky aho fa na fahafatesana, na fiainana, na anjely, na ireo fanapahana, na zavatra ankehitriny, na zavatra ho avy, na hery, na ny ambony, na ny ambany, na inona na inona amin'izao zavatra ary rehetra izao, dia tsy hahasaraka antsika amin'ny fitiavan'Andriamanitra izay ao amin'i Kristy Jesosy Tompontsika." Romana 8/38 - 39.
"Dia hoy Jesosy taminy: Tiava an'i Jehovah Andriamanitrao amin'ny fonao rehetra sy ny fanahinao rehetra ary ny sainao rehetra (Deo. 6. 5). Izany no didy lehibe sady voalohany. Ary ny faharoa, izay tahaka azy ihany, dia izao: Tiava ny namanao tahaka ny tenanao (Lev. 19. 18)" Matio 22/37 - 39
Ho an'Andriamanitra irery ny Dera sy ny Laza ary ny Voninahitra mandrakizay ary ho an'izay tia Azy ny fandresena efa nentin'i Jesosy nitia ny olombelona rehetra.
