Miarahaba antsika rehetra,
Miangavy am-panajana antsika rehetra hivavaka ho an'ireo izay manisy ratsy antsika, ho an'ireo izay manenjika antsika fa izany no mampiavaka ny tena zanak'Andriamanitra. Mamelà ny helok'izy ireo, misaora azy fa fanoitra mampandroso antsika hifikirantsika amin'Andriamanitra ireny.
Hoy Izy amintsika:
"Misaora izay manenjika anareo; misaora, fa aza manozona." Romana 12/14;
"Fa Izaho kosa milaza aminareo hoe: Tiava ny fahavalonareo, ary mivavaha ho an'izay manenjika anareo" Matio 5/44.
Aza mamaly ratsy azy fa tsy fomban'ny zanak'Andriamanitra ny manozona: "
... misaora fa aza manozona" Romana 12/14.
Mampahery anao aho fa sady fanomezam-boninahitra an'Andriamanitra izany no lalam-pahasitrana ho antsika. Mankato ny teny = Manome voninahitra; sitrana ny fotsika, ny fomba fiainantsika. Toe-po araka ny sitrapon'Andriamanitra izany satria teniny (baiko) io ary hoy Izy:
"... izay manao ny sitrapon'Andriamanitra no maharitra mandrakizay" 1 Jaona 2/17.
Amporisiho ny fotsika hahay hisaotra izay tsy tia antsika, an'izay manakiana antsika, an'izay manenjika antsika, an'izay manozona antsika ary indrindra hahay hisaotra an'Andriamanitra fa Izy no namorona antsika sy azy ireo ka hilaza isika rehetra hoe: Misaotra Anao aho ry Ray fa tamim-pahendrena no namoronao anay olombelona hanana fijery samy hafa. Misaotra fa mampitombo ny fifikirako Aminao ny fisian'ireo izay manenjika ahy, mahatonga ahy hanao ny sitraponao izany. Mamela ny helok'izy ireo aho ary mivavaka ho azy aho fa tsy maintsy hifanena Aminao izy na ho ela na ho haingana. Asoavy izy ary tahio mihoatra noho ny efa nitahianao ahy. Amin'ny Anaran'i Kristy no anaovako izany vavaka izany. Misaotra ry Ray. Anao irery anie ny dera, ny haja ary ny voninahitra mandrakizay. Amen
