Betsaka ny mieritreritra sy toa manome tsiny an’Andriamanitra mihitsy aza hoe : maninona no misy ny fakam-panahy. Eny fa na dia tamin’i Adama sy Eva, nisy sahady ny voankazo voarara. Na Jesoa Kristy, nampidinina tety an-tany hamonjy izao tontolo izao koa aza, nentina nalaina fanahy tany an’efitra.
JAKOBA
1.2 Ry rahalahiko, ataovy ho fifaliana avokoa, raha iharan'ny fakam-panahy "Na: fizahan-toetra" samy hafa hianareo,
1.3 satria fantatrareo fa ny fizahan-toetra ny finoanareo dia mahatonga faharetana.
1.12 Sambatra izay olona maharitra fakam-panahy; fa rehefa voazaha toetra izy, dia handray ny satroboninahitra fiainana, izay nolazain'ny Tompo homena izay tia Azy.
1.13 Raha misy alaim-panahy, aoka izy tsy hanao hoe: Andriamanitra no maka fanahy ahy; fa Andriamanitra tsy azon'ny ratsy alaim-panahy, sady
tsy mba maka fanahy olona Izy;
1.14 fa samy alaim-panahy ny olona, raha tarihin'ny filany sy fitahiny izy.
1.15 Ary ny filàna, rehefa torontoronina, dia miteraka ota; ary ota, rehefa tanteraka, dia miteraka fahafatesana.
1.16 Aza mety hofitahina hianareo, ry rahalahy malalako.
Vavaka nampianarin’ny Tompo :
Matio 6.13 Ary
aza mitondra anay ho amin'ny fakam-panahy, fa manafaha anay amin'ny ratsy.
Ny fampianarana tiana ho zaraina amintsika izany dia ny hoe : Tsy Andriamanitra akory no maka fanahy ny olona, saingy mitondra ny olona kosa izy mba ho zahana toetra. Izany hoe, aleo hazavaina tsara fa, ataon’Andriamanitra eo anatrehan’ny olona fotsiny ny trangan-javatra ; tsy manery ny olona Izy hoe tsy maintsy manao na manaraka an’izany ary mamela ny olona hieritreritra sy hisafidy izay tiany.
Raha tena manaiky an’Andriamanitra ka hitany fa mankato Azy tanteraka anefa isika dia tsy hitondra antsika halaim-panahy akory Izy.
II PETERA 2.9 « dia fantatry ny Tompo izay hamonjeny ny tsara fanahy amin'ny fakam-panahy sy ny hitehirizany ny olona tsy marina amin'ny fijaliana ho amin'ny andro fitsarana »
I KORINTIANA 10.13 Tsy misy fakam-panahy nahazo anareo afa-tsy izay zakan'ny olombelona; nefa mahatoky Andriamanitra ka tsy hamela anareo halaim-panahy mihoatra noho izay zakanareo; fa momba ny fakam-panahy dia hasiany làlana hahafahanareo koa mba hahazakanareo izany.
Ny anton’ny fakam-panahy dia fizahan-toetra ny finoana ary ny tanjona dia ny faharetan’ny finoana.
Ny volamena aza sedraina sao misy hosoka. Ny vary aza kororohina ihavahan’ny akofa sns.
Koa Andriamanitra te ahafantatra amin’ny olona rehetra izay nohariany hoe : Iza no tena tsy mivadika Aminy ?
