Ho an’i Maman sy Pàpà !
Mba afarako kely ange Maman, ilay namnao mpitondra divay iny, lazao fa mila vitsivitsy izahay, ho ampiasaina amin’ny fanasàna ny Alahady izao.
Fety mantsy io ho fankalazana fa nahomby daholo ny “ paika haitraitra“ naroson’i Mose Lechein BAROUFF, hanimbàna ny toe-tsaina Malagasy.
Tena nety izao ilay heviny, mampianatra ny mpanao gazety sy ny mpisahana serasera malagasy maro, mba handiso ny soratra sy teny malagasy ampiasainy,
amin’izay mantsy, miova tanteraka ny hevitry ny teny, nefa zavatra hafa no ambarany!
Ireo tanora mpihaino sy mpamaky, ary ny taranak’ireo ao afara ao ,noho izany, handiso tsikelikely ny tenindrazany, ka hiteny hoe : ahoana sy mankaiza avy moa no fomba fanoratra an’izato sy izaroa…. .Izay teny Malagasy soratana avy ve ? Tsotra sady mora, soratana araka izay anononana azy fotsiny dia izay….! Tsy mila ivakiana loha izany io………
Manome toky an’I Maman aho, fa afaka roapolo taona, ho foana ny teny Malagasy madio ranoray, ka hitovy laharana amin’ny fiteny kiriolona izy amin’izay…… Sady tsy vazaha no tsy gasy…… Fahafirin’ny firenena tsy manana hazondamosina moa ny Gasy ka hitetika ny tsy hindrana ny fitenin’olona vao afaka hampiseho hevitra …….?
Ka nahoana isika no tsy hifaly, fa tratra ny tanjona ?......
Mpampianatra sy mpitondrateny indray izao no tena kendrentsika manaraka !
Misaotra ny olom-baventy eto antoerana ihany koa isika satria, somokotra amin’ny fanajana ny fikasantsika izy ireo, Ny mpanabe sy mpanao politika malagasy mantsy samy tsy misy miasa saina ny amin’izay teny Malagasy any, fa sondriana mifangarom-bava, ka finaritra ery !
Sssss…. Rehefa teny dia teny, hoy izy, f’angaha io mampiova zavatra akory, tsy mila ahitsy, tsy mila arenina, tsy mila fanavaozana, soraty “NGODABE” fotsiny d’efa ampy…! Ry zareo mpanohitra fitondrana izao no tena manahirana anay fa tsy izany …..!
Ho azy ireo mantsy ny atao hoe mpanabe ;dia manao izay ahalehibe vatan’olona no heviny; tsy ilaina ny ankoatra izay… Fa nofy ririnina !
Ary ny atao hoe politika; midika tsy firaharahiana na inona na inona, afatsy tombontsoany ihany. Tsy ilaina ny ankoatra izay….. Fa nofy adala !
Efa kilalaontsika ireto ankolafy ireto, ka tsy atahorana na kely akory aza e!
Ka tsy tsara ve izany hoy I Maman ?
Ikala sy Ikoto koa no tena isaorana f’efa tsy mampiasa intsony ny teny Malagasy ry zareo…
Omaly izao, fanazavana antsipirihiny momba ny toe-tsaina tsara iainana, sy ratsy tokony ialana no nasehony. Ka inoako marimarina fa nisy roa be izao ny vazaha nahita azy iny tamin’ireo vazaha maromaro eto Madagasikara……
Ireny vazaha namantsika sendra nahita ireny mantsy, atahorana ndrao tsy mahay miara-miaina amin’izy samy izy. Any amindry zareo anie tsy misy fampianarana toy ireny e !………
Fantatra fa tsy ilain’ny Malagasy rahateo izany manatsara toe-tsaina izany.
Sady amin’izay koa, mba sahirankirana ihany vao ahazo tsara ny tian-kolazaina ireo Malagasy mianak’endry mijery e !…. Misaotra r’ireto a !.......... Mahay ianareo ka !
Vao anikeheo i Bozy, namoaka lahateny mikasika indrindra ny fitondran-tena ho an’ny mpitaiza zazavavy kely…… Fenofeno ery ny foko, fa kely fotsiny ny fampianarana nomentsika azy, amin’ny tsy tokony hitenenana teny Malagasy,na fara faharatsiny mba mandiso, nefa dia vitany an-tsakany sy andavany ny anjarany.
Tahaka ny tsy teto Madagasikara no fihevitro ny tenako…….Fatratra iny ka!...... Tena raitra.
Mba faniriko loatra ry Maman! raha feno roa na telo ny vazaha namantsika nahita azy iny. Mampalahelo loatra mantsy raha tsy mahay mitaiza zanaka ireny vazaha ireny. Any amin-dry zareo tsinona tsy misy ny torolàlana momba ny fanabeazana !
Tsy ilain’ny Malagasy rahateo ny torohevitra sahala amin’ireny, satria tsy mahasoa azy.
Aza matahotra I Pàpà, fa tsy manahirana antsika ny asa e! Izay teny malagasy avy ve …….
Hosorantsika tentely, sady hotolorantsika voninahitra be miezinezina ireto mpanao dokam-barotra eto Madagasikara ireto.
Tena mety sady tonga lafatra tsara mihitsy ireny dokam-barotra tsy misy tamingana teny Malagasy ireny, satria vazaha ihany no antsoina hividy fa isika tsy mila ny volan’ny malagasy…….. Tafita e ! …… Mankasitraka Tompoko ô !....
“Chien Mechant” hoy ilay takelaka mipetaka etsy amin’ny vavahadinay. Misy vazaha betsaka atahorana hangalatra mantsy, ka feperana tsara ndrao mitonantonana.
Fa ny tena mahakivy ny fikambananay izao, dia ireto tanora vitsivitsy mihevi-tena ho mahavita azy erÿ, ka miseho mikabary, mandaha-teny, manoratra, miantsa, amin’ny izany teny Gasy madio tsy misy tomika izany…..
F’angaha ianareo ranona tsy hiteraka sa tsy hitaiza a! Ho azonay ihany ny zanaka aman-jafinareo ireo…..
Ny ekipanay ange sady misy ao amin’ny gazety, no misy eny an-dampihazo, eny, hatrany am-piangonana aza…. An-tsoratra, am-bava, an-kira, an-tsehatra ……
Sady ny anay re rahavana tohanan’ny mpitondra fanjakana Malagasy mihitsy a ! Tsy sarotiny amin’izay manoratra sy miteny malagasy diso any izy….. Ho aiza eo anefa ianareo e !
“AZA ADINO” izany !
Manome toky anareo aho, ry Maman sy Pàpà, fa tsy ho ela dia hisy ny soratra : Lave Voul, Akou vave, sy ny njoul à mass…….. Aza taitaits zany ,hoah, m’lamna fotriny fa mandé hoaz ny fainan..…………!
SOLOFOMANJATO
