Kitra – Tompondakan'i Madagasikara
Norombahin'ny Akademia Ny Antsika ny amboara
Tsara fanombohana ry Ibrahim tamin'ity lalao ity, izay nahay nifehy ny baolina
8 taona aty aorian'ny nitsanganan'ilay toeram-panofanana baolina kitra an-dry zareo Akademia Ny Antsika tany Antsirabe dia lasany ihany ny anaram-boninahitra ambony indrindra teto Madagasikara, teo amin'ny taranja baolina kitra. Taorian'ny andro farany teo amin'ny «Poule des As», natao ny faran'ny herinandro teo tokoa mantsy, dia nanana isa 9 izy ireo, tsy resy mihitsy tamin'ireo lalao 3 nataony, ka nahatonga izany anaram-boninahitra izany. Raha hiverenana ny lalao omaly, tetsy Mahamasina, teo amin'ny fihaonan'ny Akademia sy ny Adema, izay famaranana kely mihitsy dia nivoaka ho mpandresy tamin'ny isa 2 noho 0 ny ekipan'Antsirabe, tamin'ny alalan'ny baolina tafiditr'i Mika(7') sy Carolus(72'). Hita ho tsara fanombohana ihany ry Ibrahim sy ry Lanto tamin'ity lalao ity, izay nahay nifehy ny baolina ary tena sahirana mihitsy ry Guy Beloha sy ry Tojo nanakana ny fanafihana nataon'izy ireo, samy nampiseho ny traikefany ihany koa ny mpanazatra tamin'ny fampijoroana ireo mpilalao, saingy ny an-dry Rivo no nahomby, izay tsy nampijoro an-dry Tovo voalohany, na dia nampiditra an-dry Rahery sy ry Thôlix kosa anefa ry Franck dia tsy nety nahita hirika intsony, ary dia io isa 2 noho 0 io ihany koa no nisarahana taty amin'ny fe-potoana ara-dalàna. Isan'ny tena andrasana izany ny mety ho fihaonan'ny Akademia ny Antsika Tompondakan'i Madagasikara sy ny Jssp Tompondaka Renioney, misy an-dry Bolida sy Yvan, eo amin'ny fiadiana ny Tompondakan'i Afrika, amin'ny volana janoary.
Rabenaivo
gazetiko
24/11/2008
