mba nahita an'ity tantara ity zah de mba zaraiko am-nareo...:)

Mpanoratra: Arilaza RANDRIAMAHEFASOA

Ao amin’ny Biraon’ny talen’ny Gazety Fiainana no miseho ny tantara.

Tale : Mandrosoa ianareo telo mianadahy. Misy vaovao lehibe vao reko an-telefaona ity, ka izany no antony nampiantsoiko anareo. Ataoko fa fantatrareo tsara Ingahy Ratsarafitia, ilay lehilahy mpanefohefo mipetraka ery Avarabohitra ?


Mpanao Gazety 1 : Ilay rangahy manana tany fambolena midadasika sy orinasa mpanodina ny vokatry ny tany ho hanin-kohanina ?


Mpanao Gazety 2 : Mba lalina koa ny fahasahian’ilay zanany faralahy naka ny anjara fananany rehetra tamin’Ingahy Ratsarafitia an !


Mpanao Gazety 3 : Ny nafitsoky ny rainy no tena lalina koa ! Iny tokoa dia nozarainy tamin’izy mirahalahy zanany ny fananany.


Mpanao Gazety 2 : Ny nanangonan’ny faralahiny izany no ela, dia lasa nitsoatsoaka tany Idilambato ilehiry.


Mpanao Gazety 1 : Fa angaha izany ihany. Nalaza be anie ny nandaniany ny fananany rehetra tamin’ny fiveloman-dratsy tany e !


Mpanao Gazety 3 : Toa tena kofona mihitsy ilehiry fa nanjary nahantra fadiranovana, raha vao nanomboka kely foana ny mosary any Idilambato.


Mpanao Gazety 2 : Misy milaza aza hoe lasa mpiandry kisoa ilay adala !


Mpanao Gazety 1 : Toa miady sakafo amin’ny kisoa mihitsy, hono, fa tena tsy manana hanin-ko hanina.


Tale : Tena fantatrareo tsara ny tantaran’ilay zanaka adalan’Ingahy Ratsarafitia. Ny aminy indrindra no antony namoriako anareo telo mianadahy eto. Araka ny telefaona voaraiko teo, dia tafaverina ao amin’Ingahy Ratsarafitia izy, ary misy fety be karakarain’Ingahy Ratsarafitia ho fandraisana azy.


Mpanao Gazety : Fety be ho fandraisana ilay maditra lahy iny ? Tena lalina izany !


Tale : Ka izao e ! Mandehana ianareo telo mianadahy mankany Avarabohitra, any an-tranon’Ingahy Ratsarafitia. Ataovy izay hahazoanareo ny vaovao rehetra mikasika ny fiverenan’io zanaka adala io. Raha ilaina dia mangataha fotoana amin’Ingahy Ratsarafitia sy amin’ny zanany ary amin’izay olona rehetra mety hanampy anareo amin’ny fanangonana izany vaovao izany. Dia fotopotory tsara ny antonanton’izao fodian’ilehiry tampoka izao, sy ny fomba nandraisan-drainy azy, sy izay zavatra nitranga tamin’ny fihaonan’izy mianaka voalohany, sy izay nanosika an-drainy hanao izao fety izao, sy izay mba hevitry ny rahalahiny mikasika izao fiverenany izao. Trandrao daholo izay rehetra azo trandrahana mba hahafahantsika mamoaka lahatsoratra miezinezina mikasika izany, dieny rahampitso ihany. Aza adinoina ny maka sary, fa tsy misy lahatsoratra tsara tsy arahan-tsary. Ataoko fa zava-dehibe hahaliana ny mpamaky ny tantara hafa kely toy izao. Fotoana fohy sisa dia hanomboka ny fety karakarain’Ingahy Ratsarafitia. Koa aza mitaredretra ianareo, fa tonga dia mihaingà izao ankehitriny izao ihany.

Resaka nifanaovana tamin’ny rainy

Mpanao Gazety 1 : Manao ahoana ianao, Ingahy Ratsarafitia ? Misaotra anao indrindra aho noho izao fandraisanao ny Gazety Fiainana ato an-tranonao izao. Tsy izany fa mba misy fanontaniana vitsivitsy tiako apetraka aminao mikasika ity fety karakarainao ity.


Ny rainy : Mahafaly ahy tokoa ny mandray anao eto. Nefa, betsaka ny zavatra mbola tsy maintsy sahanina amin’ny fanomanana izao fety izao, koa mangataka anao aho mba tsy ho lava tarihy amin’ny resaka hifanaovantsika.
Mpanao Gazety 1 : Eny, tompoko. Hatao ady vomangan'Ikirijavola tokoa, izy ity, ka ny voa-masony no hopotsirina. Fantatry ny olona rehetra ny hatsaram-panahinao sy ny fahamarinanao. Saingy nanaitra ny maro ihany izao nanatsoranao ny tananao handray ny faralahinao izao, dia ilay zanakao izay efa nanala-baraka anao tamin'ny nandaniany ny fanananao tamin'ny fiveloman-dratsy. Tsy vitan'izany ihany fa mbola manomana fety be indray ianao ho fanamarihana ny fodiany ato aminao. Tena ray mahagaga tokoa ianao, tompoko, ary mahatalanjona izao fihetsika asehonao izao.

Ny rainy : Misaotra amin'ny fanontanianao. Tsoriko aloha fa tsy hitako izay zavatra mahatalanjona ataoko amin'izao fandraisako ny zanako izao. Tia ny zanako tahaka ny itiavan'ny ray rehetra ny zanany aho. Samy tiako tsy misy tombo sy hala izy mirahalahy. Ary ny fitiavako azy dia tsy miankina velively amin'izay fihetsiny sy izay ataony amiko. Hainao tsara angamba ny teny ao amin'ny Soratra Masina manao hoe : Fitiavana mandrakizay no nitiavako anao, koa izany no nampaharetako famindrampo ho anao (Jer 31 : 3).

Mpanao Gazety 1 : Marina izany, tompoko. Kanefa ataoko fa tsy misy ray aman-dreny izay afaka hampitovy tanteraka ny fomba itiavany ny zanany rehetra, na dia samy miaro tena ny amin'izany aza izy ireo matetika. Mety ho hafa noho ny fomba nitiavanao ny lahimatoanao ny fomba nitiavanao an'Ifaralahy. Mety ho tsy dia nohonohanao be tahaka ny nataonao tamin'ny zokiny izy, ka izany no antony niheverany tena ho tsy nila fiankinana taminao, sy nahafahany nandao ny tranon-dray aman-dreniny ?...

Ny rainy : Raha nilaza taminao aho teo hoe tiako ny zanako, dia amin'ny fitiavana mahari-po sady mora fanahy, izay mandefitra ny zavatra rehetra, mino ny zavatra rehetra, manantena ny zavatra rehetra ary maharitra ny zavatra rehetra, amin'izany fitiavana izany no itiavako azy (I Ko 13 : 4-7). Amin'izany fitiavana izany koa no itaizako sy anabeazako ary anoroako azy ny lalana tsara. Ary mbola amin'izany fitiavana izany ihany koa no ananarako sy anitsiako azy, raha mivaona ny famindrany. Kanefa, na dia izany aza ny fitiavako azy, raha nanapa-kevitra handositra ahy ny faralahiko, dia tsy afaka hanohitra azy amin'ny sitrapony aho. Tiako izy, nefa kosa dia manaja ny safidiny sy ny fahafahany aho. Ny ray aman-dreny amiko dia tsy natao ho mpamolaka olona. Tsy mbola nanampatra ny fahefako sy ny heriko tamin'ny zanako mihitsy aho. Saingy raha lasa izy, dia tsy nanova na inona na inona tamin'ny fitiavako azy, na ny fialany tato an-tranoko, na izay zavatra rehetra mety ho nataony tao aorian'ny nandaozany ahy.

Mpanao Gazety 1 : Eny, kanefa, tsontsa izy rehefa niala teto aminao, moa ve tsy azo lazaina ho tomponandraikitra ny amin'izany fahatsontsany izany ihany ianao ? Angamba voaaro be loatra izy teto aminao, ka tsy voahomana hahay hihatrika ny fandrika navelatr'ireo namany izay nanararaotra ny fahalemeny sy ny fikarohany fizakan-tena, mba handavoana azy ?

Ny rainy : Tsy tao aorian'ny nandaozany ahy, fa talohan'izany, fony mbola teto amiko izy, no efa nivelatra taminy ny fandrika, ary tamin'ny fotoana nialany teto amiko no nahalatsahany tamin'izany fandrika izany. Amin'ny fotoana izay anapahan'ny olona hevitra hanapaka tarangana ny fifandraisany amin'ny rainy, dia mandao ny sehatry ny fianakaviana, izay naha-zanaky ny rainy azy izy, ka miditra amin'ny sehatra hafa izay tsy maha-zanaka azy intsony. Tsy ny fananana mety ho nohariany, na izay mety ho nolaniany ao anatin'izany sehatra vaovao iainany izany no zava-dehibe, fa ny fanohizany ny fisiany . Kanefa, tsy nisy intsony izy, satria tsy misy zanaka raha tsy misy ray. Ny ain'ny olona dia tsy miankina amin'ny habetsahan'ny zavatra ananany, hoy ny Soratra Masina (Lio 12 : 15), fa miankina amin'ny fisiany kosa. Ny fahadisoan'ny zanako dia tsy ny nandanilaniany foana ny fananany akory, fa ny finiavany hanapaka tanteraka ny fifandraisany tamiko.

Mpanao Gazety 1 : Avadiko indray ny resaka, fa kelikely ihany moa ny fotoanantsika. Inona kosa no nanesika anao handray azy indray ?

Ny rainy : Ny fitiavako azy ihany. Tsoriko aminao fa nanomboka tamin'ny fotoana nialany tato an-trano, dia tsy nitsahatra niandry ny fiverenany aho. Fantatro fa raha hiverina izy, dia tsy maintsy handalo amin'ny fahorian-tsaina lehibe, noho ny fahatsiarovany tena ho diso, ho mpanota. Azoko an-tsaina fa tsy nanana fitiavana ny tenany intsony izy, ary nihevitra fa tsy hisy olona mety ho tia azy intsony koa. Nefa na dia izany aza dia tao aminy ihany ny fanantenana fa ny rainy, izaho izany, dia tsy handà azy raha miverina izy. Izany rehetra izany no tonga tao an-tsaiko, raha nahatazana azy lavitra aho, ka onena azy ny foko.

Mpanao Gazety 1 : Rehefa noraisinao izy dia nasainao nodiovina sy nampitafiana ny ankanjo tsara indrindra, nasainao nomena peratra sy kapa koa ?......

Ny rainy : Aza adinoina ny zanak'omby nafahy izay niandrasako izao fiverenany izao, ka nasaiko novonoina mba hifaliana miaraka aminy. Zava-dehibe io. Ny fihaikeny heloka sy ny fibebahany dia ampy mba hanomezako azy ny lanja tokony ho azy indray. Izany koa no hanavotako, ao anatin'ny fifaliana nahita azy, ny fahamendrehana izay atafiko indray ilay zanako efa maty, fa velona indray, ary efa very fa hita indray.

Mpanao Gazety 1 : Dia mbola mamerina ny fisaorako anao ihany aho noho ny nandraisanao ahy teto, sy noho ny nanazavanao ny amin'izao fifaliam-be ato an-tokantranonao izao.

Resaka nifanaovana tamin'ny faralahy

Mpanao Gazety 2 : Manao ahoana ianao Andriamatoa Ratsarafitia ? Ianao no tompom-pety androany. Mifaly noho ny fiverenanao avokoa ny olona rehetra, indrindra ny rainao. Heverinao ve fa mendrika handray izao haja sy voninahitra lehibe izao ianao ?

Ny faralahy : Tsia ! Tena tsy mendrika izao aho. Efa nifidy ny tsy hiankina intsony tamin'ny raiko aho, na tamin'inona na tamin'inona. Efa nandeha hatramin'ny farany tamin'ny fanatanterahana faniriako izany aho. Noho ny fitadiavako fahafahana dia efa nahavery izay rehetra nananako aho : ny volako, ny fananako, ny fahamendrehako. Nanao fiainana aho, nefa tsy nahomby tamin'ny fiainako. Rehefa nahatsiaro ny fahavoazako aho, fa bankirotika sy nolapanan'ny hanoanana, dia nipetraka hieritreritra...

Mpanao Gazety 2 : Nieritreritra hoe ianao ?...

Ny faralahy : Eny ! Tena nieritreritra aho. Tao anatin'ny niainako tamin'ny tsy fisiana sy ny fahafoanana, dia tokana ihany no faniriako : ny hody aty amin'ny raiko. Fantatro tsara fa tsy mendrika antsoina ho zanany intsony aho, fa tsy mba nanome voninahitra azy, dia izy ilay lehilahy marina sy tsara fanahy. Nefa tao amin'ny fahorian'ny vatako sy ny fanahiko, dia nanana fanantenana ihany aho fa handray ahy hiasa ato aminy izy, mba hahafahako mivelona.

Mpanao Gazety 2 : Dia izany fanantenana izany no nitarika anao tamin'ny fiverenanao nilonji-pahantrana sy feno fanenenana ?

Ny faralahy : Izany tokoa. Hoy aho hoe : Raha mba mety hanome.... asa kely, sy toerana kely, ary sakafo kely ahy aza ny raiko ! ny raiko ! ny raiko !...

Mpanao Gazety 2 : Eny, saingy, manao ahoana izato halehiben'ny nanimbanao ny fiainanao ?...

Ny faralahy : Marina izany. Efa tena nanimba tena tokoa aho, efa nanapotika ny fiainako, ary efa nandrava ny amiko rehetra. Nandà ny raiko aho. Nandà ny fianakaviako aho. Nandà ny fiainako lasa rehetra aho. Tonga tamin'ny fara tampon'ny faharatsiana aho. Izany no nahatonga ahy hihevitra fa efa maty tokoa aho.

Mpanao Gazety 2 : Fa hono, ho'aho ! Raha ny marina anie, dia tokony ho nanampy anao tamin'ny fandraisana an-tanana ny fiainanao ny faneken'ny rainao ny fitadiavanao fahafahana e ! Tokony ho nanampy anao hahatsiaro tena ho tompon'andraikitry ny fiainanao izany.

Ny faralahy : Izay indrindra no naha-diso ahy. Fikomiana no niainako izany fitadiavana fahafahana izany tato am-poko. Raha nandao ny raiko aho, dia notapahako avokoa izay rehetra nety ho nampifandray ahy taminy. Nananako ny zavatra rehetra, nefa tsinontsinona intsony aho.

Mpanao Gazety 2 : Nahoana ary no niandry efa tena fongana tanteraka ianao, vao niverina ?

Ny faralahy : Antony maromaro no nampisalasala ahy. Ny henatro ny tenako sy ny henatro ny raiko aloha, voalohany indrindra, ary ny tena tsy fahafantarako mihitsy ny raiko. Tao koa ny fiheverana ny zokiko, izay tsy mba naditra toa ahy. Tsy mba niala tao an-tranon-drainay izy. Nitondra tena tsara toy ny zanaka filamatra izy. Izaho kosa, raha hiverina, dia tsy afaka hiverina toy ny zanaka hendry, izay manaja ray aman-dreny.

Mpanao Gazety 2 : Ahoana no fahitanao ny fandraisan'ny rainao anao ?

Ny faralahy : Tena nanaitra ahy ny fomba nandraisany ahy. Tsy mba nandrasako intsony ny mbola hiheverany ahy ho toy ny zanany indray. Hitady asa ato aminy no antony niverenako. Nefa dia nahagaga ahy ny nahatsapako fa hay tsy mpizara hanina sy fananana fotsiny akory ny raiko. Nasehony ho hitako sy ho fantatro tsara izany maha-ray ny ray. Nabaribariny tamiko ny fifaliana sy ny hafanan'ny fon'ny ray mandray ny fiverenan'ny zanany nania. Tsy mba fanomezana ahy izay ilaiko, na fanaramana ahy, na fiantohana izay hahafahako mivelona, no nitsenany ahy, fa fitiavana sy fifandraisana. Ifaliana sy iravoravoana ny fiverenako. Zava-dehibe amiko loatra izany.

Mpanao Gazety 2 : Inona ary no heverinao ho fiovana entin'izao fandraisan'ny rainao anao izao eo amin'ny fiainanao ?

Ny faralahy : Eo akaikin'ny raiko aho dia hahatsiaro hatrany ny fiverenako tao anaty fahantrana, nefa dia noraisina tahaka ny zanaka malala.

Manomboka izao dia mahatsiaro tena ho tena manana fifandraisana marina aminy aho. Ilaiko tokoa ny mifandray aminy. Ny fitoerana ao anatin'io fifandraisana aminy io no ahazoako antoka ny amin'ny fiainako ho avy rehetra.

Manampy izany, dia afaka mitia azy koa aho, noho ny fahatsapako ny fitiavany ahy. Ny fiainako sisa rehetra dia ho laniako amin'ny fisaorana sy fitiavana azy, satria efa namela ny heloko rehetra izy, efa nanavotra ny aiko tsy hidina tany an-davaka izy, efa nanarona famindram-po sy fihantrana ahy izy (Sal 103). Tsy hanan-java-mahory intsony aho, satria mitoetra ato aminy (Sal 23).

Mpanao Gazety 2 : Dia misaotra anao indrindra aho noho ny nanekenao hiresaka tamiko androany.

Resaka nifanaovana tamin'ny lahimatoa

Mpanao Gazety 3 : Manao akory ianao, tompoko ! Mamelà ahy hilaza aminao avy hatrany, fa amin'ny olona rehetra dia tena zanaka modely ianao. Maka lesona amin'ny fiainanao avokoa ny manodidina anao rehetra.

Ny lahimatoa : Raha misy izay maha-zanaka modely tokony halain-tahaka ahy, dia noho ny fananako ireto filamatra ireto : Asa, fianakaviana, ary tanindrazana. Fantatro fa izay tadiavin'ny raiko, tahaka ny itadiavan'ny ray aman-dreny rehetra izany amin'ny zanany koa, dia ny hiasan'ny zanany tsara, ny hiheverany sy hitiavany ny fianakaviany, ary ny hitoerany eo amin'ny tanindrazany, mba hamelo-maso izany. Ny fanatanterahana izany filamatra izany no imasoako eo amin'ny fiainako.

Tsy mba tiako ny mirotoroto, nefa tsy tiako koa ny manapatapaka izay ataoko. Tsy mba izaho no hanohitra ny raiko. Zava-dehibe amiko ny fankatoavana azy. Izay ataoko rehetra dia ikendreko famokarana avokoa, mba ahafahana mitsinjo izay ilaina.

Matoky ahy ny raiko. Fantatro fa miorina amiko ny fanantenany, ary miandry ahy izy mba handova sy hamelo-maso ireo fananana izay nolovany tamin'ny rainy koa, sy ireo harin'ny tanany.

Mpanao Gazety 3 : Mba misy fanontaniana kely vitsivitsy tiako hapetraka aminao mikasika ny fiverenan'ny zandrinao sy ny fety omanin'ny rainao ho fandraisana azy.

Ny lahimatoa : Fiverenan'iza hoe ? Fiverenan'ny zandriko ? Azafady fa tsy fantatro mihitsy izany vaovao izany. Vao avy nanara-maso ny fandehan'ny asa teny an-tsaha mantsy aho izao mody izao. Hay niverina ao ilay zaza maditra ? Ary hifetena ny fiverenany izany zava-maneno sy dihy re hatraty ivelany izany ? Ataoko fa tsy mendrika hanaovana izao fety izao ny olona mpiliba sy mpandanilany foana ny fananana nomen'ny rainy azy tahaka ilay zaza tsy mendrika iny !

Mpanao Gazety 3 : Azafady indrindra ! Raha tsy diso aho, araka izany teninao izany, dia lavinao ny handraisana ny rahalahinao ?

Ny lahimatoa : Izany tokoa ! Laviko ny handray azy. Ary tsy vitan'izany ihany, fa mbola manan-ko lazaina betsaka amin'ny raiko koa aho, noho ny nahihirany sy ny namakiany akotry tamiko.

Mpanao Gazety 3 : Tsy vitan'ny hoe mandà ny zandrinao ianao, fa mitsipaka tanteraka ny rainao koa ! Toa tsy mahatsiaro fifaliana amin'ny fankatoavanao ny rainao intsony ianao ?

Ny lahimatoa : Marina izany ! Tsoriko fa raha nifikitra tamin'ny raiko aho hatramin'izay, dia ny mba tsy hampitoviany lenta anay mirahalahy.

Mpanao Gazety 3 : Raha izany no izy, dia azo lazaina fa tena zanaka saro-piaro ianao ! Ary noho izany fahasarotam-piaronao izany no antony nanankinanao tanteraka ny fifalianao amin'ny safidin-drainao, toy ny fanaon'ny andevo sy ny mpanompo. Tsy mba anananao ny fitiavana, dia ny fitiavana izay manome fahafahana sy fitoviana amin'izay olona tiavina.

Ny lahimatoa : Mba mieritrereta kely kosa ange ianao e ! Efa masaka tato an-tsaiko hatramin'izay ny handova fananana be izay tsy hifampizarako na amin'iza na amin'iza intsony. Nefa amin'izao fotoana izao dia maty momoka izany fanantenako izany, fa niverina ny zandriko.

Mpanao Gazety 3 : Mamelà ahy, raha hanao izao fanamarihana kely izao aho. Ny olona rehetra izay mahalala anao dia mihevitra fa amin'ny fitiavana sy ny fifaliana tsy miandry takalony no antony nijanonanao teto amin'ny trano sy ny tanin-drainao.

Ny lahimatoa : Tsy izany velively ! Efa samy nomen'ny rainay ny anjara fananana tokony ho anay avy izahay sy ny zandriko. Nitovy ny fananana azonay. Nefa satria izaho irery ihany no nijanona teto an-toerana, dia efa nivonona handray izay rehetra tavela eto aho, raha tonga ny fotoana hahafatesan'i Dada.

Saingy niverina indray ny anao lahy. Ary matoa izy niverina dia vonona ny hiasa. Noho izany dia tsy maintsy hifampizarainay mirahalahy ny vokatra sy ny tombom-barotra amin'ny fananana rehetra eto. Marina fa efa laniny ny kapitaliny, fa tsy maintsy manome azy ny anjarany amin'izay mety ho tombony rehetra aho.

Mpanao Gazety 3 : Mba te-hiverina kely amin'ilay resaka nataonao mikasika ny rainao teo aho. Nolazainao fa nahihitra taminao izy.

Ny lahimatoa : Izay tsy lanin'ny vavoniko mihitsy amin'izao zavatra izao, dia ny fahatsapako fa tena nanararaotra ahy mihitsy ny raiko. Jerenao anie e ! Izay ela izay aho no efa nanompo azy ka tsy mbola nandika ny didiny na dia indray mandeha akory aza ; nefa tsy mbola nomeny na zanak'osy aza mba hifaliako amin'ny sakaizako. Fa raha vao tonga kosa io zanany io izay efa nandany ny fananany tamin'ny vehivavy janga, dia namono ho azy ny zanak'omby nafahy izy.

Mpanao Gazety 3 : Efa mba nangataka izany tamin'ny rainao ve anefa ianao ? Ary moa mila fanomezan-dalana avy amin-drainao ianao raha te-hanao izany ? Tsy anao avokoa ve izay rehetra ananany ? Afaka manao izay tianao hatao amin'ny fanananao, izay ampahany amin'ny fananany koa, ianao. Koa nahoana no tsy mba nifaly tamin'izany araka izay naha-diavolana ny fonao ianao ? Angamba tsy nanao izany ianao satria mainan'ny fitiavan-tena ny fonao, ka tsy mba nety nandany andro sy nandany vola aman-karena mba hifaliana miaraka amin'ny namana ? Mety tsy manana namana akory ianao. Angamba tsy mba misy toerana ho an'ny fifaliana sy ny fihaonana amin'ny hafa ao amin'ny fiainanao ?

Ny lahimatoa : Marina izany. Tsy mba manana olona izay azo lazaina ho tena namana aho. Ary matoa aho tsy mba niraharaha namana loatra, dia ny mba hahazoako ny fitiavan'ny raiko. Nefa amin'izao fotoana izao dia very maina izany, satria tsapako fa very izay noheveriko ho fitiavany ahy.

Mpanao Gazety 3 : Tsy varotra anie ny fitiavana e ! Hitako miha-miseho ihany ao ambadiky ny saron-tavan'ny zanaka hendry isaloranao ny tena maha-ianao anao, dia zanaka tsy ampy fitiavana. Tsy ampy fitiavana ny rainao ianao. Tsy tia azy ianao, fa matahotra azy, ka miandry azy hiteny aminao hoe : mamonoa zanak'osy dia asao ny namanao ka miaraha mifaly aminy. Manampy izany, dia tsy manaja azy akory ianao, satria tànanao ho olona kahihitra sy tsy mamaofy akotry aminao izy.

Ny lahimatoa : Afaka miteny izay tianao ho tenenina rehetra ianao. Zavatra tokana ihany no masaka ao an-tsaiko. Tsy ekeko ny mbola haha-zanaky ny raiko mitovy lenta amiko an'io zanaka adala io. Laviko ny handraisana azy sy ny hifaliana amin'ny fiverenany. Tsy azoko mihitsy izao fihetsika sy fifalian'ny raiko mandray io zanany maditra io izao. Tena mifanohitra amin'ilay tantaran'ny jorery sy ny vitsika mihitsy izao atrehantsika izao. Efa nandany ny androny tamin'ny filibàna ny zandriko. Noho izany dia tokony hiharan'ny valin'izany izy amin'izao fotoana izao. Tsy izany anefa no sitrapon'ny raiko. Tsy mba manasazy izy, fa manarina sy mamerina ny zanany adala , izay nifona taminy, amin'ny fahamendrehana indray. Tsy azoko mihitsy izany rehetra izany. Manonofy aho angamba !...

Mpanao Gazety 3 : Ho tapahiko eo angamba aloha ny resatsika, fa iny tazako manatona hiresaka aminao iny ny rainao. Misaotra anao indrindra, tompoko.

(Hitohy)

de tapaka teto koa le tantara fa miandry ny tohiny zany

ary mety ahavita manoratra tantara ihany koa ianao ry Fiffi an!,fa tena hainao ny nampita azy :-*:-*:-*:-*
Mba omeo ny tantara noforoninao any e!.Zany an!

:-*:-*:-*