Sarimihetsika mamoafady
Olona efatra naiditra am-ponja
Tratran'ny mpanakanto ihany ireo nanoso-potaka sy nanala baraka azy tamin'ny fanamboarana sary hampilalaovana mpanakanto amin'ny fihetsika mamoafady.
Enin-dahy no indray nosamborin'ny polisy tamin'ilay fanapariahana sy famarotana kapila manjelatra misy fihetsika mamoafady misy ny sarin'ireo mpanakanto telo vavy , dia i Volatiana, i Tosy ary i Mima. Saingy ny efatra tamin'izy ireo ihany, taorian'ny fanadiadian'ny mpitsara mpanao famotorana no notanana am-ponja. Ny roa ambiny nomena fahafahana vonjimaika.
I Volatiana mihitsy no nitory, nitondra ny raharaha teo anatrehan'ny manam-pahefana. Izy mihitsy mantsy, raha ny fanazavany, no nahatratra an'ilay tovolahy iray, 17 taona, nivarotra an'ity kapila manjelatra ity teo aminy. “Teny Bel'Air izaho sy ny namako, ny alarobia teo, no nifanena tamin'ity tovolahy mpivarotra. Tao anaty fiara teo amin'ny tobin-dasantsy iray teny an-toerana izahay tamin'io no tamy nanatona anay ity tovolahy mpivarotra. Teo amin'ireo namako izy no nanatona ary tonga dia niteny hoe : "inty ilay VCD-n'i Volatiana manao porno"", hoy izy.
Teo no ho eo ihany i Volatiana sy ireo namany dia nivoaka ny fiara nihazona an'ity mpivarotra, ary lasa haingana niantso ilay polisy nandamina ny fifamoivoizana teo akaiky teo. Nentina tany amin'ny biraon'ny polisy ny anao lahy ary nojerena teo ilay horonan-tsary mamoafady. “Hay ny sarinay telolavy ihany no natao teo amin'ny fonon'ilay kapila manjelatra, nanaovana fanoloana sary, mba hanintonana mpividy. Fa ny ao anatiny, dia vazaha vavy avokoa no milalao ao”, hoy i Volatiana.
Efa nivoaka an-gazety
“Afa-baraka mihitsy izahay amin'izao toe-javatra izao. Ka tsy handeferana”, hoy izy tamin'ny feo entitra.
Nosoritan'ity mpanakanto ity fa efa herintaona izao, no nandrenesany ny tenany hoe milalao sarimihetsika mamoafady, izay raketina amin'ireny kapila manjelatra ireny. Saingy tsy dia nahataitra azy firy satria noheveriny ho tsaho mandeha fotsiny. Kanjo, navoakan'ny gazety mpiseho isan'andro teto an-drenivohitra izy ny 2 febroary teo, izay izy vao nahatsapa ny tena fahamarinany. “Tankina aho raha nandre izany ka niezaka ny hahatratra. Saingy tsy nifanehetra tamin'ireo mpivarotra, raha tsy vao izao. Izaho rahateo koa tsy misy tsy mahalala, ka raha izaho no mody manontany ireo mpivarotra dia tsy misy sahy mampiseho izy ireo. Soa fa nisy ireo namako niaraka tamiko”, hoy izy.
Mody mivarotra gazety ireo mpivarotra, raha ny fanazavan'ity mpanakanto ity. Nefa hay any aminy any feno kapila manjelatra hosoka ana mpanakanto malagasy. “Tsy miandry ny mpividy hanontany mihitsy izy ireo amin'izany fa izy no tonga dia manambara ny fananany azy”, hoy ihany i Volatiana.
Teo amin'ny famotorana azy moa ity tovolahy ity no nanondro ireo lehilahy dimy namany ka izay no nahatrarana azy rehetra. Saika teny Analakely avokoa ireo namany no nosamborina.
Nirina Rakotoson L'Express de Madagascar
