Tsy naondran'ny Air Mauritius i Pierrot Rajaonarivelo
Tsy mahafeno ny fepetra ahafahana miondrana amin’ny zotra maorisiana ny praiminisitra lefitra araka ny voalazan’ny tompon’andraikitra.
Efa nanao andrimaso teny Ivato ireo mpitandro ny filaminana.
Mbola mitohy ny fiandrasana ny fiaingana avy atsy Maorisy. Tsy neken'ny orinasa ara-pitaterana “Air Mauritius” hiondrana tao anaty fiaramanidina i Pierrot Rajaonarivelo omaly. Mbola mikiry ny hitodi-doha aty Madagasikara hatrany ny sekretera nasionalin'ny antoko Arema na dia eo aza ny sakantsakana ataon'ny fitondrana. Ny fametrahana ny antontan-taratasy filatsahan-ko fidiana no isan'ny mahamay azy hiverina eto an-tanindrazana amin'izao fotoana izao.
Tamin'ny alalan'ny lahatsoratra tao amin'ny AFP no nahalalana fa nikasa ny higadona teny amin'ny seranam-piara-manidina Ivato indray ingahy Pierrot Rajaonarivelo izay mikasa ny handray anjara amin'ny fifidianana izay hotanterahina amin'ny 3 desambra.
Fantatra fa omaly tamin'ny 11ora sy sasany maraina no tokony handao an'ity nosy rahavavy ity ny sekretera nasionalin'ny antoko Arema taorian'ny tsy fahafahana midina tao amin'ny seranam-piaramanidin'ny Ambalamanasa ao Toamasina tamin'ny asabotsy lasa teo.
Voarotsaka
“Tsy mahafeno ny fepetra ahafahana miondrana amin'ny zotran'ny Air Mauritius i Pierrot Rajaonarivelo araka ny voalazan'ny tompon'andraikitra iray ao amin'ny seranam-piaramanidin'ny Plaisance atsy Maorisy”, hoy ihany ilay lahatsoratra hita toa amin'ny AFP. Voalaza ihany koa fa noho ny fangatahan'ny tompon'andraikitry ny Aviation civile de Madagascar (Acm) no nahatonga izao fanapahan-kevitra izao. “Mety hitera-doza ho an'ny fiaramanidina sy ny mpandeha ao anatiny ny fiondranan'i Pierrot Rajaonarivelo”, hoy ihany ilay tompon'andraikitra.
Araka ny vaovao voaray avy any an-toerana dia tsy tonga teny amin'ny fiaramanidina ny praiminisitra lefitra teo aloha. Azo inoana fa nampandrenesina talohan'ny fotoana izy.
Tsara ny mampahatsiahy fa tamin'ny asabotsy lasa teo no nikasa handao ny nosy La Réunion i Pierrot Rajaonarivelo. Nandamoaka ny fandaharam-potoana na dia efa mafana aza ny fanomanana nataon'ny mpomba ny sekretera nasionalin'ny Arema.
Namoaka didy fandrarana ny fidinan'ny fiaramanidina izay niafara tamin'ny fanakatonana ny seranan'i Toamasina ihany koa ny fitondrana ka tsy tanteraka araka ny tokony ho izy ny fihetsiketsehana. Na izany aza anefa, tontosa soa aman-tsara ihany ny kongresy nasionaly izay natao tany Toamasina ka naharitra hateloana.
Fanindroany noho izany no voasakana tsy hanitsaka ny tany malagasy ny praiminisitra lefitra tamin'ny fitondran'ny Amiraly Didier Ratsiraka. Tsy mifarana eo anefa ny fikasan'i Pierrot Rajaonarivelo hody eto an-tanindrazana.
Hisambotra
Mbola mandeha hatrany ny feo eo anivon'ny mpanohana azy izay milaza fa “amin'ny asabotsy ho avy izao farafahatarany no higadona eto Madagasikara ny sekretera nasionalin'ny antoko Arema”. Toa mampanahy ihany anefa ny ahafahany hametraka ara-pomba ofisialy ny taratasy filatsahan-ko fidiana alohan'ny ora farany izay voatondro ho amin'ny asabotsy misasakalina.
Tsikaritra teny amin'ny seranam-piaramanidina iraisam-pirenena Ivato omaly ny fisian'ireo mpitandro ny filaminana avy amin'ny ankolafiny samihafa ary mirongo fitaovam-piadiana. Raha tombatombanana dia sahabo ho 150 eo izy ireo no niandry ny fahatongavan'i Pierrot Rajaonarivelo.
Raha nanontaniana ity manamboninahitra iray izay teny an-toerana omaly dia nilaza fa ny hisambotra ny sekretera nasionalin'ny Arema no teny anton-dian'izy ireo teny Ivato. Naharitra hatramin'ny alina ny fiambenana satria fantatra fa zotra roa mampitohy an'i Madagasikara sy Maorisy no nandrasana omaly.
Stéphane Solofonandrasana
Date : 13-10-2006
