FIVAROTANTENA. 30 euros ka hatramin’ny 50 euros ny « vetivety »
16-02-2006 / 10:16
Volabe tokoa, sady mora azo no raisin’ireny mpivarotena ireny atsy amin’ny Nosy La Réunion.
Niakatra Fitsarana tany La Réunion tamin’ny talata teo ireo mpivarotena voasambotry ny zandary tany an-toerana izay Malagasy ny maro amin’izy ireo araka ny nitateran’ny gazety JIR nivoaka omaly azy. Tamin’ny taon-dasa moa izy ireo no nosamborina.
Hampangaina fa « mikaoty » lehilahy (racolage) eny amoron-dalana eny. Fomba izay voararan’ny lalàna frantsay. Izay tratra moa dia tsy maintsy mandoa lamandy 3750 euros. Amin’io fivarotantena amin’ny fomba efa maoderina io dia 30 euros ka hatramin’ny 50 euros moa ny saran’ny firaisana « vetivety » amin’izany. Lazaina ho maoderina moa ilay izy satria mampiasa fiara mihitsy ny ankamaroan-dry zavavy.
Volabe tokoa no azo ka izany no mahasarika ny vehivavy hanao asa fivelomana an’io fivarotantena io. Rehefa nandalo teny amin’ny tribonaly ny raharaha dia voalaza kosa fa tsy dia mitombina ny fiampangana ireo vehivavy ireo. Tsy voaporofo koa ny fampiasany ny fitaovana, toy ny fiara voasoratra etsy ambony, ny fomba fiakanjo izay mihantsy ireo lehilahy sy ny zavatra maro hafa. Tetsy andaniny , tsy nisy nandà ny zavatra nataony ny rehetra. Tsy voararan’ny lalàna rahateo ny fivarotantena tsotra izao. Io ilay antsoin’ny vazaha hoe, asa tranainy indrindra eto ambonin’ny tany. Rehefa nivoaka moa ny didin’ny tribonaly dia voasazy handoa lamandy 50 euros ireo vehivavy tsirairay. Misy fihenany 20% izany raha mahaloa ny vola ao anatin’ny roapolo andro.
Tsy vitsy ny vehivavy manao io asa io. Tsy ny Malagasy ihany fa hatrany Europe rehetra any dia ahazoana akony izany. Any Italie, ohatra, dia tonga mivarotena ny vehivavy teratany avy amin’ny firenena tatsinanana marobe. Enjehin’ny polisy izy ireny. Tsy voasazy anefa fa roahina hody any aminy fotsiny dia izay. Lasa anefa ny eo dia misisika koa ny hafa.
