Efa mihetsiketsika ny mpikambana ao amin’ny Crn amin’izao fotoana izao, na dia tsy re firy aza tato ho ato. Araka ny nambaran’Ing. Betiana Bruno izay any amin’iny Faritra Sava iny amin’izao fotoana izao, dia efa mitsangana ny “plate-forme pour le Non” any amin’ny Faritra Sava sy Diana. Izay indrindra no fototry ny diany any an-toerana efa andro maromaro izay.
Saika efa tafatsangana avokoa, hoy izy, ny amin’ny fivondronana tahaka ny any Antsiranana I sy II, Ambilobe , Nosy-be, Vohémar sy Antalaha ary ny any Andapa sy Sambava. Ny mbola tsy vita dia ny any Ambanja. Tsy any amin’ny fivondronana ihany no hananganana izany fa hatrany amin’ny kaominina. Raha tsy misy ny sampona, hoy izy, dia hisy fihaonam-be hatao any Ambilobe amin’ny faha-17 marsa 2007 izao. Ny tanjona moa, ho azy ireo, dia ny hampandresy ny “Tsia” amin’ny referandaoma amin’ny 4 avrily 2007 izao.
Ankoatra izany rehetra izany, nolazainy fa saika ahitana ny solontenan’ireo kandida tamin’ny fifidianana tamin’ny 3 desambra 2007 ity “Plate-forme” ity, raha any amin’ny Faritanin’Antsiranana no ambara. Raha izay izany ny any amin’ny faritra Avaratra, tsy hay na hisy ihany ny fiarahan’ireo kandida na ny mpanohana ireo kandida tamin’ny fifidianana farany teo ka hampanao ny “ tsia” izy ireo. Hatramin’izao aloha izay rehetra nihaona tamin’ny mpanao gazety ka nanambara ny heviny, dia saika hampanao “ Tsia” avokoa.
source www.wanadoo.mg
