Nifandona tamin'iny lalàm-pirenena faharoa iny, teo amin'ny Pk 96,700 km, tanànan'Ankotrokotroka tsy lavitra an'i Moramanga ny kamiao mpitatitra solika sy ny lamasinina, ny zoma alina tokony ho tamin'ny 8 ora sy 10 minitra. Ireny solika fampiasa amin'ny fiaramanidina ireny no nentin'ity kamiao ity (nalaina avy any Toamasina) ary tonga dia nipoaka raha vantany vao nifandona tamin'ilay lamasinina. Maty tsy tra-drano kilan'ny afo tamin'izany ny lehilahy iray, Andrianjatovo Maminirina Solofoheritiana (24 taona) izay mpanampy ny mpamilin'ilay lamasinina ary ny mpamily kosa, Rakotoarimalala Jean Joseph, naratra mafy.
Tsy afa-nihetsika.
May ihany koa ity farany ary tsaboina eny amin'ny hopitaly amin'izao fotoana izao. Nipitika tany anaty ala sahabo ho 30 metatra ity mpamily fa ilay namany kosa tavela tao anatin'ilay lamasinina ka dia kilan'ny afo. “Efa mba tafala teo amin'ny toerana nisy azy tao anaty “cabine” ihany izy, hoy ity mpiasan'ny lalamby iray tafaresaka tamin'ny mpanao gazety izay tonga naka ny razana tany an-toerana, satria teo amin'ny lalan-tsara no nahitàna azy. Saingy mety ho ny tongony tapaka no tsy nahafahany nitsoaka”.
Kila tsy nisy noraisina vokatr'izany na ilay kamiao mpitatitra solika na ilay lohamasinina. Ny afo moa niitatra 100m hatrany amin'ny tanety manodidina. Solika-na fiaramanidina mahatratra hatrany amin'ny 35 000 litratra any raha ny fanazavan'ny “administrateur” sady tale jeneralin'ny orinasa Madarail, no indray nentin'ity kamiao mpitatitra solika ity.
Tavela teo ambonin'ilay lalamby nanapaka an'iny lalàm-pirenena faharoa iny araka ny voalazan'ireo tompon'andraikitra ilay kamiao mpitatitra solika noho ny fahasembanana ara-teknika. Tsy afaka nandroso fa nikorisa niverina fotsiny ary latsaka tao anatin'ny lavaky ny lalamby no niafaran'ny vodin'ilay kamiao. Ilay lamasinina anefa amin'io efa niala ny garan'Anjiro hamonjy an'i Moramanga.
Nosoritan'ity tompon'andraikitry ny orinasa Madarail ity efa fa mba nandray fepetra ihany ny mpamilin'ilay kamiao nanakana fiara ary namonjy ny garan'i Moramanga mba hanakana izay lamasinina handeha hiakatra na hidina any an-toerana. Fa tsy tratra intsony. Ny lamasinina efa teny an-dalàna ary izay no nisian'ny fifandonana. Sahabo eo amin'ny 30 km miala ny toerana nisehoan'ny lozam-pifamoivoizana no misy ny garan'i Moramanga nandehanany. Ny toerana rahateo koa somary nisy fiolahana izay, no sady fidinana, ka tsy tazana izay zava-misy eo amin'ny arabe raha tsy efa eo akaiky.
Mpamonjy voina.
Raha ny fanazavan'ny “chief of staff” eo anivon'ny minisiteran'ny Fitaterana, Rakotoson Arotsilavo, dia lasa namonjy ny garan'i Moramanga indray ilay mpamily nampilaza ny zava-nanjo azy teo ambony lalamby. Tsy tokony ho izay anefa no nataony, hoy ihany ity tompon'andraikitra ity, raha nanaja ny lalàn'ny fifamoivoizana izy fa tokony ho nandeha tany amin'ny lalamby 500 metatra aloha sy aorian'ny toerana nametraka famantarana hiomanan'ny mpamilin'ny lamasinina, hampijanonany azy. Nosoritany mantsy fa tsy mitovy ny manajanona fiara sy lamasinina, mbola mikorisa any amin'ny 100 metatra any ny lamasinina vao tena tafajanona.
Ny mpamonjy voina avy taty an-drenivohitra moa no voalaza fa tonga tany an-toerana namono ny afo, rehefa nahazo baiko avy tamin'ny ben'ny tanànan'Antananarivo renivohitra, Patrick Ramiaramanana. Fiara be efatra no indray nidina tany ary tamin'ny 4 ora sy sasany maraina vao maty ny afo.
L'Express de Madagascar
Mpanoratra: Nirina Rakotoson
