Taloha elaela hono, nisy zazalahy folo taona, Ikoto no anarany, nitady asa tao amin' i Mompera Pedro tetsy Andralanitra. Dia hoy i Mompera : Mpanadio trano fivoahana no asa misy, arivo ariary isam-bolana ny karama. Dia hoy Ikoto: Mersi msé.
Nefa tamin' izany i Mompera tsy mbola nahay niteny malagasy sady mompera vazaha maro ihany koa no tao ka nanahirana ny fifandraisana fa tsy fantatra matetika izay tian' Ikoto holazaina, ilehiry mba nahay niteny frantsay ihany fa ny 'prononciation' no tsy namely mihitsy. Dia hoy i Mompera taminy: Ity aloha vola ariary zato karamanao ry zanako, kanefa tsy afaka manohy ny asanao ianao fa mandehana aloha manao cours de français manatsara ny prononciation-nao fa manahirana ny miresaka aminao.
Nalahelo Ikoto satria tsy nanam-bola hatao saram-pianarana izy. Dia nividy ronono iray litatra tamin' ny dadany izy, dia navadiny ho rononomandry iny dia namidiny, dia afaka herinandro dia lasa roan-jato ariary ny volany, nefa mbola tsy ampy hatao saram-pianarana frantsay. Dia nividianany ronono ny vola dia navadiny rononomandry dia namidiny. Dia toy izany hatrany nandritra ny iray volana ary tonga telo arivo ny volan' Ikoto, ampy hanovozam-pahaizana amin' ny olana momba ny prononciation. Hitany anefa fa ahazoam-bola kokoa ny manao aferana yaourt noho ny hanao mpanadio trano fivoahana tao amin' i Mompera koa nanapa-kevitra ny anao lahy fa tsy hianatra frantsay ary tsy hiverina any amin' i Mompera fa hampiroborobo ny varotra yaourt. Dia niroborobo tokoa moa izany...
Tsy nijanona nihatsara ny varotr' Ikoto ary nandroso fahaizana sy hafetsifetsena koa izy ka efa-polo taona taty aoriana dia tonga orinasa lehibe indrindra eo amin' ny fanamboarana yaourt ilay varotra nataony ary lasa mpanefoefo tsy misy toa izany izy. Nananany ampahany ireo orinasa lehibe teo amin' ny firenena, raha tsy hoe azy manokana aza. Nidirany ny resaka fivavahana, nataony ny politika, nilatsaka mera inedala dia lany, avy eo nilatsaka prezidan' ny repoblika dia mbola lany ihany koa.
Dia nitsidika tany amin' ny fireneny hono ny filoha frantsay ka gaga nahita ny fahombiazan' i Nedala; (aleo tsy atao nedala intsony fa efa prezida izy fa tsy Ikoto kely intsony). Saingy ny prononciation-ny amin' ny frantsay hono no mbola tsy namely tsara satria tsy nanam-potoana hanaovana cours mihitsy izy.
Dia hoy ilay filoha frantsay taminy : Raha nahay prononciation amin' ny frantsay hoatra ahy ialahy ry zandry, dia ho an' ialahy irery ny ilany atsimo amin' ny bolan-tany.
Nisaina folo segondra Ikoto dia namaly : Raha nahay prononciation amin' ny frantsay hoatra an-dRazoky aho dia ho efa-polo taona izay no naha-mpanadio trano fivoahana teny Andralanitra, tao amin' i Mompera Pedro, ahy.
(Tantara noforonina, raha mety ho mitovitovy amin' izao ny tantaram-piainanao dia minoa ahy ianao fa ho fifandrifian-javatra fotsiny izany.)
Work hard at whatever you do! (Ecc. 9.10, CEV)
