FETIN’NY RENY SY TOAKA BE LOATRA
Olona 6 naiditra hopitaly, maty ny iray.
Namono olona indray ny toaka ! Asa na nanararaotra ny fetin’ny reny ry zareo ireto, na namoy fo, na koa dia efa fitiavan-toaka tsotra izao, fa voatery naiditra hopitaly mihitsy noho ny fisotroana toaka. Olona 6 izy ireo no notsaboina teo amin’ny sampana mpikarakara ny voapoizina etsy amin’ny Hopitaly Joseph Ravoahangy Andrianavalona (HJRA), ny alahady teo (fetin’ny reny), sy omaly maraina.
Lehilahy ny dimy ary vehivavy ny iray. Ny nampalahelo dia tsy avotra intsony ny ain’ilay tovolahy iray na dia efa nanao izay ho afany aza ny mpitsabo. « Tsy zakan’ny vatany intsony ny toaka nosotroiny, ary efa ela loatra izy no tsy nahatsiaro tena, ka izao niafara tamin’ny fahafatesany izao », hoy ny mpitsabo iray nitondra fanazavana. Ny sasany amin’ireo marary kosa dia mbola manaraka fitsaboana ao amin’ny hopitaly mandra-pihatsaran’ny fahasalamany. Diovina ny vavonin’izy ireo ary ny sasany aza tsy maintsy hasiana seroma mihitsy satria dia efa tena tafiditra lalina.
Saika isaky ny misy fety izao dia tsy maintsy misy olona marary sy matin’ny toaka mandalo eny amin’ny HJRA. Tamin’ny fetin’ny Pantekoty teo izao dia efa maherin’ny roapolo no tsy nahatsiaro tena noho ny fisotroan-toaka ary roa no maty vokatr’izany. Tsy mifidy io fa na lahy na vavy dia samy tafiditra avokoa.
Ankoatra ireo olona nararin’ny toaka, dia nisy ihany koa olona izay voapoizin’ny sakafo namboarina tamin’ny menaka mandry naiditra teny amin’ny HJRA omaly.
Aina R Midi Madagascar
