Polisy marobe, nanao fanamiana maha polisy azy ary nanao fitafy sivily, omaly maraina, no tonga teny amin'ny FJKM Anosivavaka Ambohimanarina, nanara-maso ny fizotry ny fanompoam-pivavahana tao amin'ity fiangonana ity. Ireo nanao fanamiana nijanona tety ivelan'ny trano fivavahana fa ireo nanao fanamiana sivily kosa no tazana tao am-piangonana.
Tsy nisy tomika, vokatr'izany, na dia nandeha ihany aza ny feo ny mbola hisian'ny korontana ao an-toerana, fa dia nizotra tamim-pilaminana tanteraka ny fanompoam-pivavahana notanterahina tao an-toerana, izay notarihin'ny pastorany, Ramangarivo Zoly. Ity omaly ity, araka izany, no fotoana notarihiny voalohany tao amin'ny fitandremana nisy azy taorian'ny fandaminana noraisin'ny Sinodam-paritany andrefana nandaminana ny raharaha tao amin'ity fiangonana ity ka namerenany indray ny pastora Ramangarivo Zoly.
Tamin'ny 8 ora no nanomboka ny fotoana, izay nanamarihana ny isan-kerintaonan'ny vehivavy Dorkasy. Hipoka ny trano fivavahana. Feno mpivavaka hatreny amin'ny tohatra ka hatreny amin'ny alitara. Mbola maro be aza ny tsy tafiditra ka nijanona tety an-tokontany.
Tian’ny mpivavaka
Nomarihin'ireo mpino ao aminy fa isaky ny alahady dia misy fidirana indroa ao amin'ity fiangonana ity. Saingy noho ireny disadisa nisy tao am-piangonana ireny dia natao fidirana indray mandeha ihany aloha ny fotoana. Rehefa hita ho milamina tsara vao averina amin'ny teo aloha.
“Porofo izao fa ankafizin'ireo mpivavaka ato aminay ny pastora Ramangarivo Zoly fa tsy araka ireny vaovao naelin'ny olona sasany tamin'ny gazety ireny. Ny fifonana notanterahina tao am-piangonana rahateo, ny 18 febroary teo, dia niarahan'ny rehetra nanao? na ny biraom-piangonana aza? fa tsy hoe i Pasitera irery”, hoy ireo kristianina nanontaniana.
Nirina Rakotoson L'Express de Madagascar
