Communiqué de presse de la Présidence de la République de Madagascar.
Tiako-i-Madagasikara
Efa hatramin'ny Alarobia faha-15 febroary no efa nanomboka nitodi-doha nihazo an'i Madagasikara ny fiaramanidina nitondra ny Filoham-pirenena Marc RAVALOMANANA sy Ramatoa vadiny. Ny zoma faha 17 febroary 2006 tamin'ny valo ora sy fahefany alina no nigadona teny amin'ny seranam-piaramanidina iraisam-pirenena eny Ivato ny fiaramanidina nitondra azy ireo rehefa avy niala sasatra roa herinandro tany ivelany. Tsy nijanona ho fialan-tsasatra fotsiny anefa ny fitsidihana fa nisy ny adidy tsy maintsy natrehana ka ny tena lehibe tamin'izany dia :
- Ny fandevenana an-dRamatoa Coretta KING, nodimandry ny talata 31 Janoary 2006, vady navelan'ny Pasteur MARTIN LUTHER KING. Nanohy ny tolona nataon'ny vadiny izy tamin'ny fitakiana ny zon'ny mainty hoditra. Prezida amerikana, nahitana an'Andriamatoa isany President Bush mivady, Bill Clinton sy Ramatoa Senatera Hillary Clinton, George Bush rainy sy ramatoa vadiny, ary ny filoha Jimmy Carter, no tonga nanome voninahitra azy farany, izay samy niteny sy nankasitraka ny zava-bitany. Nanome voninahitra ihany koa délégasiona afrikana. Naharitra ora 6 ny fotoam-pivavahana fanaovam-beloma, izay nalefa mivantana tamin'ny televiziona maro.
Rehefa izany dia nitsidika faritra maro izy mivady, tao ny toerana notsidihina ho fialam-boly fotsiny, tao ihany koa anefa ireo toerana nijerena soritra izay azo iaraha-miasa amin'ny fampandrosoana. Tao Nevada no tena naharitra ela ny dia ka nitsidihany faritra malaza amin'ny fizahantany :
¢ LAS VEGAS, nanatrika ny fampisehoana nataon'i Elton John ny filoha mivady.
¢ HOOVER DAM
o Anisan'ny tohodrano avo indrindra eran'izao tontolo izao.
o Rano avy amin'ny LAC MEAD sy ny COLORADO RIVER no mampiodina ireo milina mpamokatra herinaratra mamatsy an'i Nevada sy Arizona hatrany California.
- RED ROCK CANYON - toerana nokilasian'ny Filoha Bush ho arovana noho ny hakantony. Mahasarika mpizahantany maro amerikana sy vahiny mahatratra iray tapitrisa isan-taona. Kanto dia kanto ity toerana ity ka tsy mianona amin'ny fizahan-tany fotsiny ny olona fa mihanika tendrombohitra mihitsy na lehibe na ankizy.
- Fihaonana tamin'ny orinasa parteneran'ny IDB - io orinasa io dia misahana ny fanajariana ny tanana sy ny fanaovan-trano.
Le Secrétariat à la Communication de la Présidence de la République de Madagascar.
