Taratasy misokatra ho an’Andriamatoa Lala RASENDRAHASINA, Mpitandrina, Filohan’ny FJKM
Tompoko,
Ho aminao anie ny fahasoavana sy ny fiadanana avy amin’Andriamanitra Ray sy Jesoa Kristy Tompo sy mpamopnjy.
Ao anatin’ny taom-panavaozana ny FJKM ankehitriny ary tsy ho ela dia hiroso amin’izany koa ny Birao Foibe JFKM.
Mihemotra ny Fiangonana tao anatin’ny 10 taona izao raha jerena ny faharisihina eo amin’ny asam-pinoana sy ny fanoloran-tena ataon’ny mpino kristiana FJKM.
Tsy azo itarafana mihitsy ny firoboroboan’ny Fiangonana ny fijoroan’ny Fiangonana FJKM etsy sy eroa fa azo itarafana ihany koa ny fisian’ny olana anatiny ka nampivaky na nahatonga fisaraham-bazana mihitsy.
Ny ankamaroan’ny Mpitandrina an-drenivohitra dia lasa tia vola ary manao fitaovana ny mpino ao aminy hanangonan-karena. Misy mihitsy aza Mpitandrina manery ny mpivavaka ao aminy tsy maintsy manome fanomezana ny Mpitandrina. Misy mpitandrina mifaninana mividy fiara sy trano ary manangana asa hafa ankoatra ny maha-Mpitandrina azy.
Zava-misy eto an-drenivohitra (Antananarivo sy ny manodidina) sy amin’ireo tanan-dehibe maro izany.
Misy anefa amin’ireo Mpitandrina izay miasa any lavitra any, izay zara raha mahita hanin-ko hanina nefa dia izy ireny mihitsy no tokony ho tohanana noho ny asa fampielezana ny tenin’Andriamanitra any amin’ny toerana izay mbola maizina noho ny tsy fisian’ny Filazantsara.
Midika izany fa mivaona amin’ny foto-kevitra napetrany efa ho 50 taona lasa izay ny FJKM ka lasa orinasam-panahy mamelona izao karazan’olona mpanao afera sy mpanao tsindrio fa lavo izao. Tsy sahaza ny vahoakan’Andriamanitra izay miaina ao anaty fahasahiranana ara-nofo ny fihetsika ataon’ny Mpitandrina maro ankehitriny.
Noho izany dia mandroso soso-kevitra izahay :
1- Aoka tsy hisy ary tsy hekena ao naty fitantanana ny raharaham-piangonana ny fandraisan’ireo tompon’andraikitra eo anivon’ny Foibe “écolage” ka mahatonga ny Mpitandrina iray na dia efa halam-bahoaka aza dia voatazona foana. Mariky ny kolikoly hita maso sy azo tsapain-tanana koa izany.
2- Tokony afindra toerana ny Mpitandrina iray mahavita folo (10) taona amin’ny Fitandremana an-drenivohitra ary homena hasina ny Mpitandrina any anaty ala sy ambanivolo be any. Afindra amin’ny toerana sahaza azy ireo efa nitandrina folo taona mahery tamin’ny Fitandremana iray.
3- Aoka ny asan’ny Mpitandrina tsy afangaro asa hafa satria adino tanteraka ny famangiana olona sy ny maha-mpiandry ny ondrin’Andriamnitra azy ireo.
Teny atsipy amin’ny manam-panahy tompoko ary raha mitohy izao fitantanana feno kolikoly eo anivon’ny FJKM izao dia ho maro toy ny zava-misy ankehitriny ireo kristiana FJKM no lasa mifindra lasy satria tsy misy aim-panahy intsony ny Fiangonana misy azy. Manakaiky ny FJKM ny faharavana koa aoka hijoro ho modely ny mpitantana.
Mirary soa ho anareo ary aoka ny Fanahy Masina hiasa mahery ao anatinareo mba hijoroanareo ho tena mpanompon’Andriamanitra, feno fandavan-tena ary tsy miaina ao anaty fihatsaram-belatsihy.
Misaotra tompoko.
