Sipagasy > hono hoa e! ahoana tsara moa ny fampiasa iny saplet iny rehefa mivavaka? arahaba ry Maria in 10 dia Rainay izay any an-danitra in 1 dia inona ihany koa?
Valiny :
Jesosy no nanome toro-làlana mazava momban’ny fomba fivavaka ao amin’ny Matio 6:9-13. Io ilay vavaka hoe “Rainay any an-danitra”.
Nampitandrina anefa Jesosy talohan’izay ao amin’ny Matio 6:7 mba tsy hanaovana “teny maro foana” satria hoy izy hoe : tsy “ny hamaroan’ny teniny no hihainoana azy”.
Noho izany dia vavaka modely fotsiny no nomen’i Jesosy ny mpianany mba hahalalan’izy ireo ny fomba fivavaka sy izay tokony atao antom-bavaka.
Porofon’izany, dia nisy fotoana koa i Jesosy mbola nampianatra ny mpianany hivavaka. Hita ao amin’ny Lioka 11:2-4 izany. Mariho fa iray ihany ny hevitra lazain’ireo andininy roa ireo, fa ny teny nampiasainy no samy hafa.
Fa ny zava-dehibe azo asongadina indrindra amin’ireo dia ny nampahafantaran’i Jesosy hoe amin’iza no tokony hivavaka.
Marina fa amin’ny maha mpanota antsika dia mbola mila olona mpanelanelana isika rehefa mivavaka amin’Andriamanitra. Voalaza ao amin’ny Timoty voalohany 2:5 hoe iza io olona io. Milaza mazava io andinin-teny io fa “iray no Andriamanitra, ary iray no Mpanalalana amin’Andriamanitra sy ny olona, dia Kristy Jesosy, izay olona”.
Izay ihany no voalaza ao anatin’ny Soratra Masina, raha momban’ny fomba fivavaka amin’Andriamanitra Mpamorona antsika.
