Nitondra fanehoan-kevitra mikasika ny raharaha fisavana ny tranon'ny zanaky ny filoha teo aloha Tojo Ravalomanana, ny jeneraly Randrianazary, sekreteram-panjakana misahana ny zandarimariam-pirenena.
Anisan'ny mbola miteraka ady hevitra amin'izao fotoana izao ny mahakasika ny fametrahana ny lalana mikasika ny fahatoniana politika ary tafiditra amin'izany ny lalana momba ny famotsoran-keloka.
Tokony hahakasika ny rehetra ny famelan-keloka ary zava-dehibe eo amin'ny fivoahana amin'ny krizy ny fandraisan'anjaran'ny ankolafy rehetra raha ny voalazan'andriamatoa Eric Wong, mpiandraiki-draharaha eo anivon'ny masoivoho amerikanina eto amintsika.
Ho an-dramatoa Ruffine Tsiranana, minisitry ny Fanapariaham-pahefana, dia mizotra araka ny tokony ho izy ny asan'ny governemanta ary misy tokoa ny firaisankina eo amin'ireo mpikambana ao.
Nitohy androany ny atrikasam-pirenena mikasika ny fitsarana. Ny zava-misy teny amin'ny fitsarana an-tampony Anosy no entina amin'ity fanadihadihana manaraka ity.
Tsara ny fananana toe-tsaina sahisahy sy tia karokaroka any anivon'ny orinasa raha ny voalaza androany nandritry ny fampizarana traikefa nataon'ny mpikaroka sady mpandraharaha avy eo anivon'ny "Groupement d'Entreprises de Madagascar".
Nanamarika ny fisiany ny fikambanan'ny injeniera asa vaventy na Fiavama, ny faran'ny herinandro lasa teo. Maherin'ny 90%-n'ny injeniera misahaha ity sehatra ity, dia mahita asa avokoa, ka ny sehatry ny tsy miankina no tena mampiasa azy ireo.
Notokanana tamin'ity androany ity ny ivotoerana antsoina hoe CERVO, na Centre d'Etudes, de Réflexion, de Veille et d'Orientation, izay hisahana ny asa iarahan'ity birao nasionaly misahana ny fitantanana ny loza voajanahary ity sy ireo mpiara-miombon'antoka.
Nahazo fanampiana avy amin'ny fikambanana MDM ny klioban'ny AJESAIA. Natolotra ho an'ireo ekipa izay hiatrika ny famaranan'ny amboaran'ny Ajesaia ny alahady ho avy izao, ireo fanampiana ireo izay ahitana fitaovana sy lelavola.
