Aharitra 4 andro be izao ny lanonana hiarahabana ny filohan'ny tetezamita Andry Rajoelina sy ramatoa vadiny noho ny fahatratrarana ny tonon-taona. Io no tapaka tao amin'ny filankevitry ny ministra omaly.
Amin'ny maha-ray amandrenin'ny eto amin'ny firenena azy, dia hiroso amin'ny fifampirarian-tsoa ny filoha teo aloha, Zafy Albert. Tsy nanavahana an'iza na iza ny fanasana.
Niantso amin'ny fahendrena sy ny fitoniana ny jeneraly Ramakavelo, taorian'ireo disadisa nisy tao anivon'ny foloalindahy. Nanome ny heviny ihany koa ity mpikambana ao amin'ny filankevitra ambonin'ny tetezamita ity mikasika ny fivoriana tsy ara-potoanan'ny parlemanta.
Notolorana mari-boninahitra ny solotenan'ny UNICEF eto Madagasikara Bruno Maes. Handao an'i Madagasikara ny lehilahy ary maro rahateo ny zava-bitany teto amintsika.
Tsy ahitam-bahaolana hatramin'izao ny fitokonana ataon'ireo mpampianatra mpikaroka eny amin'ny Anjerimanotolo.Araka ny fehin-kevitra taorian'ny fivorian'izy ireo dia mitohy ny fitokonana.
Misy faritra andro ratsy, ahiana hivadika ho rivo-doza amin'izao fotoana izao ao amin'ny lakandranon'i Mozambique. Araha-maso akaiky ny fivoaran'izany.
Taorian'ny fetin'ny Noely sy ny taom-baovao dia nambaran'ireo tompon'andraikitra ao amin'ny sampana fanadiovana ny renivohitra fa efa eo am-panatanterahana ny asa izy ireo.
Mitana ny laharana faha-2 i Madagasikara eto amin'izao tontolo izao, raha ny aretina pesta no resahana. Nosokafana io maraina io, tetsy amin'ny Institut Pasteur etsy Avaradoha ny atrikasa ho fanamafisana traikefa mikasika ny pesta.
Efa nilaza ny governemanta amerikana fa handray anjara betsaka eo amin'ny fiarovana ny zava-boary eto Madagasikara. Ho fampiroboroboana ity sehatra ity dia hisy ny hetsika ho fanomezan-danja ny valan-javaboary ao Ranomafana.
