Faly miarahaba anareo amin'ny anaran'ny Tompo indray ny tenako
1 Petera 1/18 - 19 "fa fantatrareo fa tsy zavatra mety ho simba, tahaka ny volafotsy sy volamena, no nanavotana anareo tamin'ny fitondrantena adala, izay azonareo tamin'ny nentin-drazana, fa ny ra soan'i Kristy, toy ny ran'ny zanak'ondry tsy misy kilema ary tsy misy pentimpentina"
Avy amin'ny inona ny fanavotana antsika?
Voalaza eto fa tsy avy amin'ny zavatra mety ho simba na lo ny fanavotana antsika:
ny volamena sy volafotsy dia sarobidy sy lafo vidy tokoa nefa mety ho simba ihany ireny. Izany hoe tsy maharitra mandrakizay.
Voalaza ihany koa fa ny ra soan'i Jesosy no namonjena sy nividianana antsika ho afaka amin'ny fahotana. Olom-boavidy isika ka ny ran'i Jesosy no nividianany antsika.
IKorintiana 6/20 "Fa olom-boavidy hianareo; ka dia mankalazà an'Andriamanitra amin'ny tenanareo"
Ohatra: ny vola 5000 Ariary dia mahazo entana mitombam-bidy ( valeur - na ) 5000 ariary.
Noho izany, raha novidiana tamin'ny ran'i Jesosy isika: ny tombambiditsika izany dia ny rany. Sarobidy Aminy isika
"Satria malala eo imasoko ianao, eny, be voninahitra ianao sady tiako..." Isaia 43/4
Izany hoe, ny "valeur"-ntsika dia ny ran'i Jesosy.
Ohatrinona amitsika ary ny tombam-bidin'ny ran'i Jesosy? Ometsika hatraiza ny valeur-n'i Jesosy eo amin'ny fiainantsika? Voavidy vola ve? Inona no havalitsika izany?
Samy miaiky angamba isika fa lehibe sy tsy takatry ny saina izany, tsy manampaharoa ary tsy manam-pahataperana izany ran'i Jesosy izany. Nataony ho an'ny rehetra izany satria samy efa nanota ny tsirairay:
"Samy nania avokoa izy rehetra, Samy tsy mahasoa avokoa izy rehetra; Tsy misy izay manao ny tsara na dia iray akory aza" Romana 3/12 (
Sal. 14. 1-3).
Ny an'i Jodasy dia vola no tambiny:
"Ary ny anankiray tamin'ny roa ambin'ny folo lahy, atao hoe Jodasy Iskariota, dia nankao amin'ny lohan'ny mpisorona ka nanao hoe: Homenareo hoatrinona aho hanolorako Azy aminareo? Ary izy nandanja sekely volafotsy telo-polo homena azy." Matio 26/14
Ny anabavin'i Lazarosy ilay natsangan'i Jesosy: Ny an'i Marta dia ny fanajana sy fandraisam-bahiny, ny an'i Maria dia ny fanompoana an'i Jesosy:
"Dia nanao fanasana ho an'i Jesosy tao izy; ary Marta no nanompo; fa Lazarosy no anankiray tamin'izay niara-nipetraka nihinana taminy. Ary Maria, rehefa naka menaka manitra nisy narda sady tsara no sarobidy, lanjan'iray livatra, dia nanosotra ny tongotr'i Jesosy sy namaoka ny tongony tamin'ny volondohany; ary feno ny hanitry ny menaka ny trano." Jaona 12/2 - 3
Ny an'i Zakaiosy dia fanonerana:
"Fa Zakaiosy kosa nitsangana ka nanao tamin'ny Tompo hoe: Indro, Tompoko, ny antsasaky ny fananako omeko ho an'ny malahelo; ary raha misy zavatr'olona nalaiko tamin'ny fanambakana, dia honerako avy efatra heny izany." Lioka 19/8
Ny an'ilay mpanakarena tsy nety nivarotra ny fananany, alahelo no nasetriny:
Dia hoy Jesosy taminy:
"Raha tia ho tanteraka hianao, mandehana, amidio ny fanananao, ka omeo ny malahelo, dia hanana rakitra any an-danitra hianao; ary avia hanaraka Ahy.
Fa nony nandre izany teny izany ilay zatovo, dia niala tamin'alahelo izy, satria nanana fananana be" Matio 19/21 - 22
Ary ny antsika?
Hita soritra amin'ireo tantara ireo fa izay be dia be ao am-pon'ilay olona no tanterahiny sy anomezany lanja an'Andriamanitra. Izany no mamaritra ny andavan'androm-piainany. Toa izany koa isika, ny zavatra ataotsika isan'andro no anomezatsika lanja, anolorantsika "valeur" an'i Jesosy. Isaky ny misintona sy mamoaka rivotra isika dia manome sanda Azy.
Andao isika rey olona hanome lanja tsara an'Andriamanitra, ndao isika hanome sanda faratampony ho Azy, aoka ny fanomezam-boninahitra Azy no ho be dia be ao am-potsika. Aoka mba tsy hisy petimpetina ihany koa no ometsika an'Andriamanitra ( na amin'ny atao izany, na sainina, na tenenina,... izay atao rehetra mihitsy ). Satria sarobidy Aminy isika koa rariny raha ataotsika sarobidy mihoatra lavitra sy tsy takatry ny saina ny "valeur" atolotsika an'Andriamanitra. Nanolotra maimaipoana ny rany hamonjena antsika Izy, koa aoka atolotra Azy tsy misy tambiny koa ny amitsika manontolo fa izany no fanomezana Azy "valeur" ambony indrindra andrasany amitsika:
"Koa amin'izany mangataka aminareo aho, ry rahalahy, noho ny famindrampon'Andriamanitra, mba hatolotrareo ny tenanareo ho fanatitra velona, masina, sitrak'Andriamanitra, dia fanompoam-panahy mety hataonareo izany." Romana 12:1
Izao no tokony ho eo am-bavatsika: Jesosy a! atolotro ny tenako ho Anao satria efa novonjenao aho tamin'ny nandatsahanao ny ranao. Avelako anjakanao ny amiko rehetra, ny momba ahy rehetra ary manomboka anio dia hotsarovako mandrakariva fa sarobidy ho ahy izany ranao izany ary tsy avelako hiraraka an-tany fotsiny. Koa ankehitriny, ataoko lohalaharana ny Aminao rehetra ary omeko lanja faratapony sy sanda tsy takatry ny saiko Ianao. Mifoha maraina mandra-pilentika ny masoandro aho dia hanome voninahitra Anao satria hoy Ianao:
"fa izay manome voninahitra Ahy no homeko voninahitra..." 1 Samoela 2/30 ary tsapako fa nanome voninahitra ahy Ianao tamin'ny nandrakofanao ny ranao ny olombelona rehetra. Misaotra Jesosy fa tena tia anay Ianao. Amen
Ny Voninahitra dia ho an'Andriamanitra irery ihany ary manonona ny fiadanan'i Kristy ho amitsika rehetra ny tenako.
NB: raha sitrakao dia zarao amin'ny havana, namana, mpiara-mivavaka, mpiara-miasa, ... sy amin'ny olona rehetra ity hafatra ity mba ho fampandrosoana ny fanjakan'Andriamanitra. Ity no teny filamatra: "Fa mpiara-miasa amin'Andriamanitra izahay; ary sahan'Andriamanitra sy trano arafitr'Andriamanitra hianareo." 1 Korintiana 3/9 . Koa mahereza fa momba anao ny Tompo
italic text
