Raharaha nahafaty ny Lt Théodule :
« Handray fepetra ny fanjakana»
hoy ny jeneraly Camille Vital
Efa mandeha ny fanadihadiana mikasika ny raharaha nahafaty ilay manamboninahitra teny amin’ny BANI, araka ny fanazavan’ny lehiben’ny governemanta.
Efa naneho ny heviny an-gazety mikasika ny zava-nitranga teny amin’ny BANI Ivato, tamin’ny 20 may lasa teo ka niteraka ny fampidirana hôpitaly an’i Lt Ramamonjisoa Théodule ny commandant Roger Luc, rehefa voatonontonona tamin’io raharaha io ny anarany. Anisan’ny fanazavana nomeny ny hoe: «felaka tehamaina no nampihariny tamin’ny Lt Théodule izay tsy tokony hitarika ny fahafatesany.» Tsy nahasakana ny Praiminisitra nilaza ny fanapahan-kevitra horaisin’ny governemanta anefa izany, raha nanao valan-dresaka fohy ho an’ny mpanao gazety ny jeneraly Camille Vital, taorian’ny nitsapany alahelo ny fianakavian’Itompokolahy. Hoy indrindra mantsy ny Lehiben’ny Governemanta: « Efa misokatra ny fanadihadiana ary handray ny fepetra mifandraika amin’izany ny governemanta». Midika izany fa tsy maintsy hisy ato ho ato ny fisamborana izay olona rehetra ahiahiana ho tafiditra amin’ny raharaha nahafaty io manamboninahitra kaomandin’ny Fiarovana eny amin’ny BANI io.
Sazy ara-pitsarana!
Ary ny filazan’ny Praiminisitra fa tsy maintsy handray andraikitra mifanaraka amin’izany ny fanjakana, dia midika fa tsy maintsy hisy sazy hampiharina amin’izay nahavanona ny heloka raha toa ka mitombina ny fiampangana.
Vao tamin’ny zoma, nandritra ny famindram-pahefana teo aminy sy ny Minisitry ny Foloalindahy vaovao mantsy no namerimberina ny tokony hanajana ny fitsipi-pifehezana sy ny lalàna mifehy ny miaramila ny jeneraly Camille Vital. Nohamafisin’ny jeneraly Rakotoarimasy izany raha nametrahan’ny mpanao gazety fanontaniana izy ary nilaza fa azo tanterahina miaraka tsara ny sazy miaramila sy ny sazy ara-pitsarana raha misy minia mandika lalàna. Raha tsiahivina ny zava-nitranga teny amin’ny BANI Ivato dia voalaza fa am-perinasa ary tao anatin’ny toby no nitrangan’ny fifandonana teo aminy sy ny commandant Roger Luc. Naiditra hôpitaly teny amin’ny HOMI ny Lt Ramamonjisoa ary herinandro taty aoriana dia namoy ny ainy. Ny valin’ny fanadihadiana andrasana izany dia ny hoe: ny daroka nahazo azy ve no niteraka ny fahafatesana sa antony hafa fa fifanandrifian-javatra fotsiny iny? Andrasana ny ho tohin’ny raharaha.
V.R.
IO ROGER LUC IO ILAY BANDY MITETIKA NY HANONGAM-PANJAKANA KOA IO !
KARAKARAO IZY RY PRAIMINISTRA A ! MPAMONO OLONA LE ROGER LUC SSSHHH
