Serasera amin’ny Internet niafara tamin’ny fifampitoriana
1. ni81 (
13/08/2009 08:05)
Serasera amin’ny Internet niafara tamin’ny fifampitoriana
Nifampitory no niafaran’ity vehivavy gasy iray, 18 taona, sy vazaha lahy iray, 51 taona, izay nampifandraisin’ny Internet. Niakatra teny amin’ny fampanoavana ny raharaha omaly ka ilay teratany Malagasy no nitory noho ny fandrebirebena sy fanadalàna ataon’ilay vazaha. Toy izao ny fandehan-javatra. Tafaresaka tamin’ny Internet izy roa ka rehefa nipetraka ny fifampitokisana dia nikasa hanorina asa hikambanana eto Madagasikara. Nilaza ilay vazaha fa hanangana orinasa fanamboarana sambo any Mahajanga na any Antsiranana. Nampanantena izy fa horaisiny ho mpanampy azy ilay vehivavy ary tonga dia nasainy nitady trano hipetrahana eto Tana sy toerana hametrahana ny orinasa any amin’ny faritany. Nandeha tsara ny resaka teo ary na ny fanatontosana azy aza dia efa natomboka. Hita ny trano ary efa nasiana kojakoja avy amin’ny vola nalefan-drangahy. Tsy nisy ny fanahiana hatreo ny amin’ny hoe hivadika zava-dratsy ny raharaha. Nanadala. Tonga ilay «mpamatsy vola» dia mbola nandeha amin’ny laoniny ihany ny rehetra aloha. Nihatsara aza ny fiaraha-miasa ary tonga hatramin’ny fividianana fiara an’ilay vehivavy satria hoe afa-po ny mpampiasa azy. Saingy nivadika tsikelikely izany rehefa nandeha tany amin’ny faritra mba hitady ilay toerana ho asiana ny orinasa. Raha ny filazan-dravehivavy mantsy dia nitady ny handeha lavidavitra aminy ny mpampiasa azy. Manomboka manadala azy ary rehefa tsy nahazo izay nilainy dia nila vaniny amin’izay. Toy ny fandroahana an-dravehivavy nefa any amin’ny tany lavi-podiana. Tsy afa-nanoatra anefa io farany ka dia voatery nanaraka ilay vazaha. Rehefa tafaverina teto an-dRenivohitra vao nitondra ny raharaha teny anivon’ny mpitandro ny filaminana izay nanokatra ny fanadihadiana. Omaly no niakatra Fampanoavana ny raharaha ka taorian’izay dia nahazo fahafahana vonjimaika aloha ilay vazaha. Ny 18 aogositra ho avy izao no hitsaràna ny raharaha. Fantatra ihany koa anefa fa nitory ilay vazaha ary efa fanintelony amin’izao no nohainoana teo anivon’ny Fampanoavana ny notoriany. Fanodinkodinam-bola (izay nomeny) no tena anton’izany. An’iza ny tsiny ? Ho hitao eo ny didim-pitsarana amin’ny herinandro. Na izany aza anefa dia azo lazaina fa mahavita zavatra ihany ny…Internet.
