Nivadibadika tokoa ny fotoana, efa ho roa tokom-bolana izay no nadehanan-dRado. Sasatra aho no nitazana ny « facteur » fa tsy nisy na dia ilay dia-tongony aza, na efa tonga ihany koa ny taratasy fa efa nalefany any tuléar angamba. Satria adinoko ny nilaza taminy ny fotoana tokony hijanonako eto Sakaraha noho ilay loza nanjo azy. Izaho koa moa tsy maintsy niakatra satria nanomana ny fidirana eny amin’ ny sekoly ambaratonga ambony, ka voatery koa aho nandao kely an’ i Dada sy i Neny . Tsy dia nahitana teny firy aho satria, navesatra tamiko loatra ny nisaraka tamin-dRado sy ny alaheloko azy be loatra. Tsy mbola nitia ny foko ka vaovao amiko izao nanjo ahy izao. Raha nanana elatra aho mantsy dia efa nanidina tany amin’ ilay nisy azy, saingy olombelona ihany aho.
Asabotsy ny andro, tonga soamantsara tao tuléar aho, indro ilay ankizy mpiray vodi-rindrina amiko nilaza hoe: «Rondro o! naharay taratasy indry, efa ho andro vitsivitsy izay fa andraso alaiko kely». Nibitaka ny ambavafoko naharay ilay taratasy. Tena taratasin-dRado tokoa, misaotra indrindra hoy aho mantsy an’ ilay tovovavy, dia lasa aho niditra tao an-trano, novohaiko aloha ny varavarankely rehetra satria maizina loatra no mbola maimbo lao ny trano noho izy tsy nivoha loatra, rehefa avy eo dia nitsambikina teny ambonin’ ny fandriana aho namaky ilay taratasin’olontiako milaza hoe :
Antsirabe,
Ho anao ry Rondro malalako;
Antenaiko fa salama tsara ianao eo ampandraisana ny taratasiko, miala tsiny indrindra aho raha izay vao nahasoratra noho ny antony fahateren’ny fotoana, vita soamantsara ny fandevenana an’i Neny ka mikasa ny hanainga aho ny Asabotsy ho avy izao hamonjy anao. Efa manina mafy anao tokoa aho, tsy nitsahatra ny nahatsiaro anao, na dia tsy nahasoratra aza, ny foko sy ny saiko kosa anefa dia niantefa tany aminao foana.
Rondro tiako, tsy hahasoratra betsaka intsony aho fa mbola maika noho ireo fikarakarana ireo zavatra aty, raha tsy manahirana anao ny Asabotsy dia tongava eny amin’ ny station’ ny taxi brousse eny « Sansfils » fa ho tonga aho, tokony ho amin’ ny valo maraina eo ho eo no higadona ny fiara raha tsy misy ny sampona eny andalana. Izay ry Rondro a! Ka dia manao anao ho mandrapihaona vetivety. Ba betsaka ho an’ny malalako.
Rado tia sy tsy manadino anao.
Naverimberiko novakiana ilay taratasy fa toa mamiko loatra ilay namaky azy, isaky izay tsy misy atao aho dia ny namaky ilay taratasiny no namitako ny androko, tsy andriko intsony ilay Asabotsy hitsenako azy. Be loatra ny zavatra nifamahofaho tao an-tsaiko tahaky ny hoe: «dia ho hadinoiny ve aho» sy ny hoe: «tsy tia ahy intsony ve izy?» kay lahy mbola tia ahy foana ilay malalako.
Nitombo teny ny andro, ora, minitra ary ny segondra, sendra nandeha tany Maninday (Université ao Tuléar) aho no tazako tampoka i Laingo; Nody tsy nahita azy aho sady nivily lalana ka indro izy nihazakazaka namonjy ahy nanao hoe: «Rondro! ary maika ho aiza aky indry? Gaga aho naheno azy, toa niova sy lasa tsara fanahy tamiko tampoka teo, hikarakara «dossier» angaha indry? hoy izy mantsy ahy. Eny hoy aho, izaho aky saika hiakatra any Antananarivo hanao «concour Medicine» saingy aleoko ihany aky eto a! Mifona aky izaho amin’ireny fihetsiko taloha ireny fa tsapako ankehitriny fa tian-dry tokoa i Ramose Rado a! Vao maika zendana aho nahare an’i Laingo, tsy nampoiziko ity fihetsiny! izaho koa aky miala tsiny amin-dry tsy nilaza izay nisy teo aminay taloha hoy aho; ary enoko fa hoe: «maty hono aky ny maman-dRamose? Eny hoy aho gagagaga ihany! Dia mamangy ny fahoriana any aminy ary aky a! Sy ho an-dry koa satria efa fata-poko fata-pirenena ny fiarahanareo roa. Sao mba hisotro ranom-boasary aky indry fa midanika ange izany andro izany eh! Hoy indray izy mantsy ahy, tsy nandà aho satria noheveriko ho tsy fahalalam- pomba ny fandavana ny fangatahany ka nanaiky tsy fidiny aho. Rehefa avy nisotro ilay ranom- boasary izahay mirahavavy, dia nadeha niditra tao amin’ny mpikarakara naka taratasy fenoina nanaovana ny fangatahana sy ny fikarakarana ny «dossier» rehetra entina nanohizana ny fianarana izahay. Vita soa amantsara ny rehetra dia niandry ny «concour» sisa.
Nigadona ny Asabotsy nahatongavan-dRado, naka posiposy aho dia nandeha teny amin’ ny «station» nanondro tamin’ ny latsaka 5 mn ny amin’ ny 8 ora, iny tonga tokoa ilay taxi brousse avy any Antsirabe, nisomebiseby avokoa ny olona rehetra nitsena ireo havany , izaho koa mba variana niandry ilay malalako kosa; Iny tokoa eny i Rado tazako. Rado hoy aho nikikiaka mafy tsy voafehiko intsony ny henatro fa avy hatrany aho dia nihazakazaka niantsampy teny aminy, nifamihina izahay no niteny teo ampoto- tsofiny moramora aho hoe: «Rado! Tonga ihany lahy ianao, noheveriko fa tsy ho avy intsony, tsy nisy henatra izay vahoaka nijery aho fa avy hatrany dia norohako i Rado, dia lasa izahay nankany an-tranony; ho hitanao tsy ho ela ny tohiny…
