Nitifitra ny mpitandro filaminana, olona roa naratra
{mosimage}Tovolahy roa naratra rehefa nifanehatra teo Antanimena ny mpiaro ny ara-dalana sy ny mpitandro ny filaminana ny sabotsy lasa teo. Nifanjevo be ihany moa ny fandehan-javatra ka raha ny filazan'ny miaramila dia nisy andian-tanora hoe saika ho eny amin'ny Magro, nitondra « sifflet » sy hazo. ary hoe nanangom-bato saika hitoraka azy ireo, koa dia nanao tifi-danitra izy ireo hanaparitahana azy. Raikitra ny fitsoahana ka roa lahy 18 taona sy 19 taona no naratra izay notsaboina teny amin'ny hopitaly. Araka ny filazan'ireo mpanao fihetsiketsehana kosa anefa dia nitifitra an-dry zareo mihitsy ireo miaramila ka izay no namparatra an'ireo roalahy ireo. Nisy koa nilaza fa miaramila tao anaty fiara 4X4 nandalo no nitifitra. Tsy hay intsony izay tena fandehany, araka izany.
Fa nisy poa-basy koa teny Ankorondrano tamin'io antoandron'ny sabotsy io ihany. Nisy andian'olona eo amin'ny 30 isa eo nandalo teo amin'ny biraon'ny fokontany izay nisy famorana faobe. Asa izay fandehany fa nisy sahotaka ihany koa ka dia niditra an-tsehatra ny mpitandro ny filaminana nanaparitaka tamin'ny alalan'ny tifi-danitra sy ny grenady mandatsa-dranomaso. Fitaintainana kosa no betsaka tamin'io fa tsy nisy naninona.
T.H
