HAFATRA VITSIVITSY……AZO ATAO TONON-KIRA.
Fantatro ise,
Tsy iza fa i Dada fola-damosina sy i Neny nampinono no nikolokoloan’ise. Nitaiza sady nanabe, nikikitra nampianatra an’ise!
Tsaroako fa mbola velona I Dadabenareo, fony ise nahatsiaro saina.
Fahiny, hono, hoy ny fiantombohan’anganon’I Dadabenareo, ary inoako ho izao mihintsy; fa ranomasina no toa hoe valamparihintsika ? …Tsaroako, ireo bokin’i Neniny fahiny mitantara ny fironan-kevitry ny zokintsika teto…
Moa fantatr’ise ? Fahiny, hono, tsy neken’ny Japoney hahazo vahana kely akory tany aminy ny toe-tsaina Amerikana nanjanaka azy. Ny maha izy azy tena notazoniny, nampiampiany ny fanaon’iretsy mpiavy, dia lasan-davitra i Japana.
Mba hamotehana ny maha isika, dia fitaovana noheveriny hahomby nampisain’ny vazaha ny Riba sy foto-pisainany; nasesika teto.
Ka indro niodina nanaraka ny fomban-tany ise, tsy ny fomban-tany tanivon-driaka anefa, fa fomban-tany ………hafa mihtsy……….. Fomba…. tsy vahiny loatra koa akory.
Moa gaga ve ise raha hotantaraiko; fa i Naivo any Tsiroanomandidy nitaraina tamiko; f’izany fomba fitaizana ankizy sy tanora, toa raitra sy tena mahomby sady mifanaraka amin’ny toetr’andro, niseho fahitalavitra izany; mba nanitikitika azy mafy, saingy indrisy….Fa teny vahiny ranoray no nanazavan’ilay kalakely ngalingaly oly volo, zanak’i Rakotovahoaka sakaizan’ise, azy izay …… Ka tankina tsy nahaloa-teny ny anao lahy. Tsy nisy zavatra fantany tao na kely akory aza. Tent tsy valiana tsinona
Ilay hany vazaha eo an-tanàna, mpivady mitaiza kely, mifanolobodirindrina amin-dry zareo, hono, anefa; tsy niraika kely akory tamin’izato rakalakely mamatsapatsaka mafy, etsy amin’ny fahita lavitra !!!
Olon’ny tany efa madroso, hono, izy ka efa fantany, tsy mila atoro azy intsony raha izay fitaizana..
Vaovao avy any amin’ny tany niaviany no mahaliana azy.
Ka lasa saina ny anao lahy : firy avy moa ireo mijery ity fandaharana ity amin’izao fotoana ? An’arivony, Gasy tena liana fa tsy mahatakatra izay tian-kambara.
Telo Vazaha tsy miraika firy sy tsy miraharaha akory … !
Firifiry akory moa r’ise ireo zokintsika, namana sy zandry, ary avy any Dilambato. Nandany rondoha, nandany mondron-kery, nandany fotoana no nandany vola nanoratra, nandahatra, nihira sy niventy mba iheveran’ise tena momba ireny zava-mahafatifaty an’ise ireny ……
Saingy, very momoka izany mandraka ankehitriny…..
Iza moa r’ise no mpanabe mahery vaika, akaiky indrindra ireto zandrintsika, ka mahasondriana fatratra azy ery? Tsy ny serasera ve ?
Moa variana ise raha toa hilazako fa i Sahondra, any Ampamoizankova, sendra ilay gazety tantanin’ise, ilay mpivoaka isanandro iny; misy sary tena mahaliana azy; impolo kely izay, kanjo nony nofotorany ka……. teny vahiny ranoray no nameno koa ny masony.
Fa ilay hany vazaha, diso làlana teo iny, no nanao topimaso fotsiny fa tsy namaky akory ny votoatin’ireny tena zava-dehibe ireny.
Olon’ny tany efa madroso, hono, izy ka tsy mila atoro azy akory ity itsembohan’ise hosoratana, sy nandanina mondron-kery !
Vaovao avy any amin’ny tany niaviany no mahaliana azy.
Ka lasa saina ny anao vavy : firy avy moa izao ireo mijery azy ity amin’izao fotoana ? An’arivony Gasy liana dia liana, fa tsy mahatakatra izay tian-kambara.
Telo Vazaha tsy miraika firy sy tsy miraharaha akory … !
Marina fa fandrosoana izany ! nefa toa tsy misy afatsy Malagasy vitsy loatra amintsika iray manontolo, sy vazaha roa aman-telo amin’izy rehetra, no nahazo tombontsoa tamin’iny ……Ka mandroso mankaiza izy izany fa tsy hitako tsara ?
Takatr’ise ve ny tiako hambara ?
Omaly tolakandro iny, tato an-trano izahay efa-mianaka ndeha hijery fahitalavitra, fa
Malagasy no mpanolotra fandaharana malagasy, amin’ny teny Malagasy…..ka nisonanina ery haka sakafon-tsaina….. Kanjo …. Kanjo ….
Talanjona terÿ aho, fa tena teny malagsy tsy misy mandeha amin’ny laoniny izato itenenany ny tenin-drazanntsika,
Zanaka vavy voalohany naterak’ingahy Rainisoa, lazainy fa “ Zanak’ingahy Rainisoa Vavimatoa” !!!!........Ny hadirin-javatra, lazainy fa “hangezany” !!!!! ….Fotoana aza moa lazainy fa “habeny”!!!........Malagasy miteny Malagasy….
Niondrika aho fa menatra sady natahotra, matahotra ny amin-janako, sady menatra ny tenako. Tsy hitako izay hambara …. Kabary tsy valiana rahateo ny azy…
Hany heriko nandray ilay gazetin’izandrin’ise ilay misy ampahany kely tsy fidiny ho an’ny teny malagasy, fa mba nisy lohahevitra malagasy sady mpanoratra malagasy rahateo niserana teny. Ka nihaminkamina ery haka sakafon-tsaina…..Kanjo….. Kanjo……
Sorena aho, fa….. Rafi-tsoratra sy voambolana tsy misy mandeha amin’ny laoniny izato anoratan’izandrin’ise ny tenin-drazantsika.
Sao dia manonofy aza aho ?
Iza ianao, àry aiza Aho, ianareo ho aiza, ary ise taranak’iza ? …..Fa ahoana àry izy izany…
Afaka roapolo taona…
Iza no ho mpanoratra ? Hanoratra inona ?
iza no ho mpamaky ? Hamaky inona ? Taranak’iza no hofoanana ?
Lazaiko amin’ise fa ny atao hoe firenena, dia ny mponina ao, manana ny tantarany, ny taniny tsy itambarana , ny satany, ny hiram-pireneny, ny kirijam-bolany, ny ribany, ny kolon-tsainy àry indrindra ny teniny iavahany amin’ny hafa, … sy ny vitsy tsy voatanisa.
Mihevitra ve ise, fa mandehandeha ho azy eny ny ho momba antsika na tsy atosika aza ?
Satria ny namantsika, angady tsy mahatapak’ahitra ? Sa mpiantso tsy misy manoina ?
Ka hoy Izokintsika izay ..…” vahiny eto an-tanindrazako aho izany ?. “
SOLOFOMANJATO
