Ny fivoaran’ny fitadidiana eo amin’ny olombelona
Fahazazana
-Vao hanomboka hiteny ny zaza dia ny fitadidiana no ahafahany manao an’izany voalohany ary mitombo arakaraka ny taonany sy ny fitomboany izany.
-Eo anelanelan’ny 12 taona ka hatramin’ny 18 taona no tena mahatsara ny fitadidiana.
Fahatanorana
-Manomboka feno taona hatramin’ny faha 25 taona kosa dia somary mihena tsikelikely indray ny fahazoana mitadidy.
-Manampy sy mameno ny fitadidiana kosa ny fiheverana, ny fandanjalanjana, ny fahaizana mandamina ny fiainana, ny finiavana, ny hakingana sns…rehefa manomboka 25 taona ny olona iray. Izany hoe efa miatrika ny fiainana tanteraka izy manomboka eo.
Fahanterana
-Miverin-tsaina ny olona rehefa antitra. Tsy misy tadidiny ny zavatra vao avy niseho, eny fa na io hitan’ny masony sy ren’ny sofiny io aza. Ny mahagaga kosa anefa dia tadidiny amin’ny antsipirihany ny zava-nisy tamin’ny fahatanorany sy ny fahazazany.
Ireo karazana fahazoana mitadidy eo ami’ny tsirairay
Arakaraky ny olona tsirairay ny fitadidiany.
-Misy ny karazan’olona mahatadidy avy hatrany ny zavatra hitan’ny masony sy ren’ny sofiny
-Ao koa ireo mora mahatadidy ny zavatra nisy, niainany noho ny hevitra na noho ny teny.
-Misy kosa anefa ireo tsy afa-mitadidy raha tsy manoratra ny hitan’ny masony sy ren’ny sofiny.
Ireo fikojakojana ny fitadidiana
Any am-bohoka
Araka ny voalazan’ny mpandinika dia ny sakafo no isany tena mahavanona ny atidoha. Izany hoe raha mbola any am-bohoka ny zaza dia efa mila sakafo sahady. Atao tomombana ara-pahasalamana sy tohizana hatrany io hatramin’ny fahazazany.
Ho an’ny olona miasa saina toy ny mpianatra :
Sakafo
-Misy tokoa ny sakafo mandrisika ny fitadidiana dia ireo sakafo manome « protides » toy ny hazandrano na maina na lena, ny atody, ny hena, ny voamaina isan-karazany, ny fromazy. Izao anefa: tsy rehefa akaiky akory ny fotoanan’ny fanadinana vao hihinana an’ireo, fa mandritra ny taona mihitsy. Ampifandimbiasana ny fihinana azy amin’izany.
Fanafody
-Efa nisy manam-pahaizana nanaporofo fa misy fanafody mety mampitombo vetivety ny fitadidiana amin’ny fotoana fohy dia fohy. Mahavonjy tokoa izy io saingy misy akony hafa kosa ka mety hahavizana ilay mpianatra indray avy eo, na mety hanimba ny atidohany.
-Tsy manampy amin’ny fididiana kosa ny fisotroana kafe sy zava-pisotro misy alikaola ary ny fifohana sigara ho an’ny mpianatra.
Ireo antony mahatonga ny tsy fitadidiana
-Ny havizanana be loatra mialoha na mandritra ny fotoam-panadinana
-Ny tsy fahampian’ny torimaso
Ireo mahatonga ny fanembatsembanana ny fitadidiana
-Ny havizanana dia mametra ny enti-mandinika sy enti-mitadidy. Mety hanararaotra ao koa ny aretina mamizana toy ny Typhoide, Enemie, ny tazo…
-Ny tsy fahampian’ny rivotra madio. Voakasik’izany manokana ireo ankizy voan’ny kambon-tenda sy kambon’orona satria sakanan’ilay kambo ny lalan-drivotra.
-Ny tsy fahalavorarian’ny fikorinan’ny ra mankany amin’ny atidoha noho ny fahateren’ny lalan-dra.
-Ny fihetseham-po be loatra sy ny tahotra hanatrika ny fanadinana
Torohevitra vitsivitsy
-Tsy ho afa-mitadidy raha tsy eo ny fitiavana ilay fianarana. Mora tadidy kokoa mantsy ny zavatra omen-danja sy mahafinaritra ary tiana.
-Miantoka amin’ny fitadidiana ny fianarana ihany koa ny « comprehension ».
-Atao mahazo laka ny fitiavana sy fitadiavana fahalalana hampivoatra eo amin’ny fiainana fa tsy ny tahotra hiatrika ny fanadinana.
-Toerana mahazo rivotra no tsara ianarana lesona. Mamelona ny selan’ny atidoha mantsy ny « oxygene»
-Tsy tsara ny fitadidiana aorian’ny sakafo sy mandritra ny fandevonan-kanina
-Atao miandalana ny fianarana fa tsy rehefa an-katoky ny fanadinana vao manao asa koropaka.
-Manaova fialan-tsasatra fa tena ilaina izany.
-Sarodiby ihany koa ny fahampian’ny torimaso
-Averimbereno matetika amin’ny fotoana tsy lava koa ny lesona fa manampy ny fitadidiana izany.
Ho an’ny ray aman-dreny, raha vao manomboka amin’ny fahazazana dia tokony hobeazina sy hotezaina ny fitadidian’ny zaza. Amin’iny mantsy no fotoana mahatsara azy sy mora mampivelatra ny fitadidiany.
Mila kolokoloina anefa izany mba hahafahan’ny fahakingan-tsaina mivelatra tsara.
