Mba tantanonao ry Raiko
’Zato làlan-janakao
Ny mifidy toa tsy Haiko
Fa maniry indrindra Anao
Hitanao ny adin-tsaina
Mitambesatra ao an-doha
’Zany tsikin’ny maraina,
Toa ela vao hifoha.
Moa diso ny safidiko
Raha mandroso ka mankao
Sa ‘ty làla-nofinidiko
Dia tsy ilay voasoritra ?
Tanteraho ny faniriako
Ô, ry Tompo tena tia
Fa ‘ty zavatra iriko
Masina amiko doria.
Nefa raha tsy izay no didy
Namboarinao ho ahy
Amboary ny safidy
Sy ny ratra am-panahy
Atolorinao ny hery
Hampijoro izay nikoa
Ka sitranonao ny fery….
Sy ny ratrako ao am-po,
Sy ny ratrako ao am-po.
