Ity misy iray ,anisan\'ny nampangotsoka ahy fony mbola vatony ,ary mbola \"miteny\" amiko hatramin\'izao noho ny maha anti-militariste azy.
Vavak\'ilay miaramila.
\'Ty miaramila ity
tsy hoe manary dia
na mamo sady doroka ,ka miteny irery
fa misy faniriana ao am-pony miery
iandrandrany lanitra
ho amin\'Andriamanitra.
Fa mba niato kely
noho ny andro noely
ny ady , hono ,androany,ka azony ny ainy
ary eto indrindra no lasa koa ny sainy.
Manaiki-molotra izy mahita ireto basy
natao ifandripahana
mijery ireto bala manenika ny lasy
mamatotra valahana.
Ny doboka tafondro midona sy mandoaka
ny atsimo sy ny avaratra
ka manatorotoro toy ny fisafaokan\'ny kotro-pahavaratra.
Hoy ny teny ireriny mijery ny habakabaka
ary toa izany no solosolom-bavaka
avy ao anaty fony,
tsy mety mba mitony:
Andriamanitra ô! Maninona ary moa
raha atao noely , noely avokoa
ny andro rehetrarehetra
mba tsy hisy intsony
ho fongatra amin\'ny tany itony ady itony?
He! Tazanonao ,ry Tompo Andriamanitra,
Fa androany izao mba manga indray ny lanitra!
Tsy nisy zera-bomba , tsy nisy poa-basy,
mangina fehizay ny faritr\'ito lasy
Kanefa vao omaly
Firy no naratra
voatifitra eo an-tratra ?
Firy ny aina ripaka
sy nitsipatsipaka?
Ny basiko irery ,raha toa ka atontaliko
ny olona efa matiny ?
Asa izay avaliko!!
Raha toa atao hoe zato
no maty tato ho ato
dia efa zaza firy no tsy manan-dray?
firy koa ny reny izay mangahiahy?
Vokatry ny tifitra nataoko samirery ?
Manongo tena aho ,ka tsy sahy mijery
enjehin\'ny eritrritra mitady mba hiery
Ary izay indrindra no hitalaoako anao
aoka tsy hisy fetra
fa ho noely foana,miatomboka hatrizao
ny andronay rehetra
K\'ireto basy ireto,izao tafondro izao
hitsonika avokoa
hirendrika ho angady,na fiasana vao
hanjary mpanasoa.
Ny bala sy ny vanja:hanaovana sekoly
ny vola lany taminy.
Ny fiarabe manidina mpanjera baoma kosa,
mpamono ,mpampijaly,
hanjary fitaterana marary sy ny osa
hahita hopitaly
Ny vola izay laniana ho entina hikarohana
baomba famonoana:
Hoentina hanampiana ireo izay mila tohana
mitady fandrosona
Fa hay na inona ady sy hoe fifandripahana
mitranga sy mamely
dia azo aàto ihany izay fifanipahana
rehefa andro noely!
Koa rehefa tsy mahay mampiato ady intsony
afa-tsy noely
ny mponina eto an-tany fa mifanao lonjony
tsy hita velively
dia iangaviako ianao,r\'ilay tsy manam-petra
miatomboka hatrizao
ataovy noely hatrany ny andronao rehetra
sy izao tontolo izao!
Hoy \'lay miaramila ,izay miangavy anao
handray ny faniriany
kanefa dia DIDINA ASAINA MBA MANAO
NY ZAVATRA TSY TIANY.
Rado
