Fa dia farahidiny toa inona loatra re ny tenin-drazantsika no atao valalan’amboa ? Mahamenatra ny fikilasiana ny teny Malagasy ho tenin’olona ambany ka raha vao io no ifampiresahana dia mihevitra ny hafa te-ho ambony fahalalàna fa nandra ity olona iresahany ity.
Taiza tany amin’ny firenena vahiny isika no nahita fety tao amin’ny tanànany ka teny gasy no iarahabana ny reny raha tonga ny fetiny ? Firenena iza no mampiasa io fiteny io amin’ny raharaham-panjakana ao aminy na dia iray segaondra monja aza ?
Lasa ny saina sy ny heritreritra mahita ny tatitry ny governemanta eny Tsimbazaza adika amin’ny fiteny Frantsay. Fa angaha moa mahay io tenim-bahiny io avokoa ny depiote ao na ny loholona ? Sa natao hideraderana amin’ny mpamatsy vola no anton’io ? Ekena fa natao ho tenim-pirenena amin’ny fomba ofisialy ny teny Frantsay sy ny teny Anglisy, saingy aoka hajaina ny fomba netin-drazana hatramin’izay ka tsy ho folaky ny andro sendra miserana eo amin’ny fiteny avy any ivelany isika. Ny fahitalavim-pirenena ary izay natao hitaiza ny zaza malagasy amin’ny soa toavina Malagasy, dia mahamenatra raha nahita ny fankalazana ny fetin’ny reny farany teo fa zaza vao mibada dia fiteny vahiny no terena asainy iarahabana ny reny Malagasy. Soa aloha fa mbola misy ireo miaro ny soa toavina Malagasy ka tsy ho resy tondro-molotra eo anatrehan’ny taranaka malagasy isika mianakavy, indrindra fa ahatsapa tena ny be rehareha fa tsy teny fara-hidiny ny antsika fa manan-daja eo anatrehan’ny fiaraha-monina rehefa tsy omen’ny vahiny lanja.
Madagascar Tribune

Dia io voalazan'ny tribune io mihintsy ny zavatra iainana.Lasa sehoseho lay miteny vahiny amin'ny sasany.
Ka tsy hita koa anie, izarana ny tena koa anie lay miteny vahiny. satria ilaina mihintsy ny mifehy ny teny vahiny na eo amin'ny fiainana andavan'andro, fianarana na ny asa, itrandrahana ny fivoarana manera tany.
Ny tatitra nataon'ny governementa ara taratasy dia mino aho fa tsy maintsy amin'ny teny frantsay, toa izany koa ny ankabeazan'ny rapports, taratasimpanjakana rehetra eto amin'ny firenena.Raha hazavaina amin'ny teny gasy lay izy dia voatery afangaro satria voambolana ara teknika misy tsy hay sa tsy fantatra ny dikany amin'ny teny gasy.Hita koa raha vao misy vahiny iray fotsiny ny mpanatrika dia miteny vahiny na gasy aza no mameno trano.
Maromaro mihintsy aloha tato ho ato izay ny fiantsoana zavatra amin'ny teny vahiny e.
Lay izy amiko tokony ho lanjalanjaina hoe eto no hitenenenana ny teny vahiny, eto no hitenenana ny tenindreny.
Satria ny fitenenana ny fiteny dia miaraka amin'izay koa ny fiainana ny foto-pisainana sy ny ny kolontsaina lay tompon'ny fitenenana. ka raha atao tsinontsinona ny tenindrazanao dia very miaraka amin'izay koa ny tombotsoanao manana teny nolovaina tamin'ny ray amandreny.

Efa ela anie no niresaka an'izany fa isika mihitsy no efa zanatsaina e!

Ny manampahaizana sasany mihintsy no hafa eto. Rehefa miteny Malagasy ny Mpitondra dia tabatabaina ary io fahaizana teny Frantsay io no hilazana ny olona hoe tsy mahay. Raha ny tena izy dia tokony hisy teny Malagasy n'aiza n'aiza saingy mivadika resaka lalinabe io. Eto no misy hoe tsy Malagasy offisialy izany io fa teny avatsy e, avaro e. Avadika problema daholo. Ny tany rehetra mampiasa ny teniny dia manana tenimparita maro mihoatra ny 18 nefa rehefa hoe misy azo ampiasaina dia hatrany amin'ny fianarana ambony io. Tsy midika mihintsy izany fa fohanana ny teny vahiny.