de ahoana zany ity ?
Niditra amin'ny fanonganam-panjakana ny jeneraly Andrianafidisoa omaly rehefa tsy afa-po amin'ny trangan-java-misy eto Madagasikara, ka io no làlana iray no fantany fa haingana ahazoana ny fanjakana. Tapa-bolana sisa dia higadona ny datin'ny 3 desambre hanaovana ny fifidianana no mitranga ilay fanonganam-panjakana ataon'ny manam-boninahitra ao amin'ny tafika. Ny jeneraly Andrianafidisoa dia nanambara fa voafehiny tanteraka ny vondron-tafika eny Ivato ary ao ihany koa ny foiben-dry zalahy mpaka fanjakana ireto, ary nanomboka nandrenesan'ny olona maro io fanambarana omaly io, dia nizarazara be ny hevitra teo amin'ny vahoaka sy ny mpanao politika. « Tsy ny fanjakana alaina ankeriny no heverina fa ahafahana manarina ny firenena » hoy ny ventson'ny maro teny rehetra teny satria iarahana mahita ny vokany any amin'ireo firenena nisehoan-javatra tahaka izao, fa ady an-trano lava no nanjaka ka zary farahidiny ny mponina tao amin'ilay firenena.
Ny kandida izay nahavita antsakany sy andavany toy ny fanotana bileta sy ny efa lany vola be ihany koa, dia manamafy fa tsy ny herisetra no fangalana fahefana fa aleo raisina amin'ny alalan'ny latsa-bato ataon'ny vahoaka io toerena hanompoana ny tanindrazana io.
Fanonganam-panjakana iny no nataon'ity jeneraly iray ity sy ekipany, inona no fepetra raisin'ny fitondrana foibe manoloana izao ? Andro vitsy lasa izay, dia nanambara ny Praiministra lehiben'ny Goverenemanta fa handray ny andraikiny ho an'ireo minia hanakorontana eto amin'ny tany sy ny fanjakana ary iza no tsy nahatsiaro ilay teniny hoe « Tandremo sao mitomany raha tratranay manakorontana eo ». Hanao ahoana ihany koa ny akon'ireo eo anatrehan'ny vahoaka, sy ny firenena any ivelany ? Saika isan'andro no ahitana ireo karazana hotakotan-kevitra miaro herisetra eto amintsika ka niainga any amin'ny fiheverana fa tsy ara-dalàna ny datin'ny 3 desambra, nitohy tamin'ny filazana fa tokony hovana ny lalàm-pifidianana sy ny maro tsy voatanisa. Ny hita aloha dia misy karazan'olona tsy maintsy miseho foana isan'andro, ary izao mitarika any amin'ny zava-doza izao, satria tsy maintsy hisy akony ratsy eo anivon'ny vahoaka ny tarehin-javatra tahaka izao na azony ilay fahefana notsiriritiny na tsy azony.
Amin'ny ora hanoratanay ity lahatsoratra ity, dia mbola tsy tonga eto an-tanindrazana ny filohan'ny repoblika, ka hanaiky hifampizara ny fahefana amin'ireo jeneraly milaza fa eo ampelan-tanany ny fahefana ve ny tenany? Ny azo hambara aloha hatreto dia tsy hilaozan-tantara hatrany eto amintsika ka asa na mbola hazaka ireny ny atidohan'ny gasy na ahoana fa ny anio no ahafantarana ny tohin'ny tantara.
Naivo Kely Madagascar Tribune
