TOLIARA.
Fiaramanidina nipoaka dia latsaka ambony fasana, enina no maty
Omaly 25 oktobra vao maraim-be, tamin’ny 4 ora sy 14 minitra, dia nianjera ny fiaramanidina kely Cessna 425 mitondra ny laharana 5R MGV. Olona efatra sy ny mpanamory azy no tao anatiny. Tsy nisy velona na iray aza ireo olona enina ireo. Vahiny avokoa ireo mpandeha ka teratany Soisa ny iray ary Italianina ny telo. Ireo mpanamory roa lahy dia Malagasy, Zo Randriampenomanana sy ny mpanampy Andriafidison Stephane.
r.s.
Hiakatra aty Antananarivo ny dian’izy ireo. Vao niala 2 minitra avy tao amin’ny seranan’i Toliara ilay raopilanina dia voalazan’ny vaovao voaray avy any an-toerana fa nirehitra ary avy eo dia nipoaka teny am-panidinana. Rehefa izany, nianjera teny amin’ny faritra fandevenan’ny olona antsoina hoe Aviro, toerana tsy dia lavitra loatra ny toerana nialany. Na dia latsaka aza ilay izy, dia mbola nitohy hatrany ny firehetany. Tsy nisy tafavoaka izy enina ary voalaza fa may kila daholo. An’ny « Service et Transports Aériens » (STA) ity fiaramanidina ity.
Ireo vahiny namoy ny ainy ireo dia miasa amin’ny fitrandrahana vato eto amintsika. Monina ao Toliara ny iray. Izay zavatra niseho marina nahatonga ny firehetana dia tsy fantatra mazava. Efa nidina any an-toerana, omaly ihany, ny tompon’andraikitra isan-tsokajiny avy ao amin’ny ACM, ASECNA ary ny ADEMA, sampana izay mikarakara manokana ny fifamoivoizana sy ny seranam-piaramanidina eto amintsika. Fanadihadiana ara-teknika no hosahanin’izy ireo. Etsy andaniny koa anefa, efa misy ny famotopotorana isan-karazany ataon’ny mpitandro filaminana. Vao niseho ny loza dia efa narovana ilay toerana nianjeran’ny ropilanina. Izany dia mba hahamora ny fikarohana sy ny famotorana rehetra hatao.
Tao anatin’ny taona maromaro izay dia fiaramanidina madinika hatrany no niaran-doza teto amintsika. Ny farany tamin’izany, ilay Piper Aztec nidoboka tany amin’ny seranam-piaramanidin’Ambatondrazaka. Nitondra tompon’andraikitra ambony izy io. Soa ihany fa tsy nisy ny aina nafoy tamin’izay. Lavidavitra kokoa, fiaramanidina nitondra mpihaza avy atsy amin’ny nosy La Réunion no nianjera, efa teny akaikin’ny seranan’Ivato. Avy any amin’ny faritr’i Mahajanga izy io. Tsy nisy velona tamin’ity indray mitoraka ity ny mpandeha sivy tao anatiny.
Midi Madagascar
