Hirotsaka ho fidiana ny Pasitera Randrianjoary Jules.
Ny Pasitera Randrianjoary Jules, mpitondra Fiangonana “évangélique” Tsimiankina no kandidà faha 16 amin’ny fifidianana izay ho Filoham-pirenena ny 3 desambra 2006.
Efa tafatsangana ny KPMJ na Komity Mpanohana an’i Pasitera Jules Randrianjoary. Hiatrika ny mpanao gazety io Komity io ny talata 22 aogositra 2006, amin’ny 10 ora ao amin’ny Solimotel Anosy.
Araka ny re, eo amin’ny sehatry ny finoana, dia toa efa tafantsangana izany Fiombonan’ny Fiangonana Kristiana Tsimiankina eto Madagasikara izany. Raha tsotsorina ny dikany, dia toy ny fiombonan’ny Fiangonan-dehibe ara-drafitra ao anaty FFKM, no mba iombonan’ny Fiangonana Tsimiakina amin’izany. Voalaza koa fa mitotaly 3000 ny Kongregasiona avy amin’ireo Fiangonana Tsimiankina ireo. Karazana Fitandremana na Paroasy izany, ka ireo no ivondronana ho Fiombonam-piangonana iray.
Araka ny feo mandeha koa, dia Atoa Randrianjoary Jules Mpitandrina no Filohan’io Fiombonam-piangonana io, raha tsy diso ny tsiliantsofina renay. Fiangonana vitsivitsy ihany no tsy mikambana ao araka ny voalaza. Tsy tafiditra ao ohatra ny Apokalipsy sy ny FPVM Taninandrano.. Ity farany rahateo moa dia mikatona ka naman’ny mbola mihantona. Hisedra tena araka ny demokrasian’ny tany noho izany ny Tsimiakina, ka dia ho hita eo izay tena heriny.
Raha marim-pototra tokoa izany resaka Fiombonan’ny Tsimiankina izany, dia mahavariana ihany fa nampiray ny mpivavaka ny raharaha politika. Resaka raharaham-pirenena sy politika no laharam-pahamehana eo amin’ny raharaha no hatrehana. Vita izany, vao mety hiditra amin’ny lafiny fampianarana sy ny zava-panahy (doctrine sy dogme), ilay Fiombonana. Manahirana ihany ny manavaka ny fihevitr’Andriamanitra sy ny fihevitr’olombelona, raha toa izany tsy mifanindran-dalana.
Razaka O. Madagascar Tribune
