Tao anatin’io lavaka io no nariana ilay zaza.
Zazakely, (lahikely) menavava no nisy nanary tao an-davapiringa teny Soanierana atsinanana, omaly maraina vao mangiran-dratsy. Mbola nihoson-drà izy, raha ny fanazavan'ireo tompon-trano nahita ny loza, ary ny tadim-poitrany tsy mbola tapaka. Dia nihosona sy nilona rano maloto tao.
“Vao tapa-bolana teo, hoy i Tovo tompon-trano, no nanamboarana an'ity lavapiringa ity. Any ambadiky ny trano no misy azy ary tsy hitan'ny olona afa-tsy izahay ato an-trano sy izay nanamboatra azy tao ihany”. Nosoritany fa misy lavapiringa talaky maso iray teo an-tokotany. Fa tsy tao ilay zaza no natsipy. “Izay no manaporofo, hoy izy, fa olona mahafantatra tsara ny momba an'io lavaka vaovao io no nahavita izao loza izao”. Efa mandeha, araka izany, ny fanadihadiana.
Na dia izany aza anefa, avotra soa aman-tsara ihany ilay zaza. Tsy nahadifotra azy mantsy ny rano tao anatin'ilay lavaka. Ny fitomaniany no ren'ny manodidina ka izay no nahafahana namonjy azy. Nodiovina, nampitafiana ary niantsoana mpitsabo nanapaka ny tadim-poitrany. Izay vao nentina tany amin'ny hopitaly. Ao amin'ny hopitaly Befelatanana, izany izao ilay zaza. Teo no ho eo ihany dia nisy vehivavy nivonona ny handray sy hitaiza azy. Efa nomeny anarana, araka izany, izy : Tolojanahary Avotra.
Nirina Rakotoson L'Express de Madagascar
