Tamin’ny Sabotsy lasa teo no noravan’ny fifohazana sy ny mpitandro ny filaminana ny doany Ambohitranjomba, doany iray malaza ao Alatsinainy Bakaro, 50 km miala an’Ambatolampy. Nokasaina handova ny fiambenana ity doany ity ny zazavavy iray 16 taona ka niady mafy tamin’ny aretina vokatry ny mosavy nahazo azy.
Havan’ny tompon’ilay doany ity zazavavy ity, ka efa niara-nanompo ity doany ity izy sy ny ray amandreniny, sady mivavaka ihany. Taona vitsy lasa anefa izay dia tapa-kevitra ry zareo fa hiala amin’ity fanompoana doany ity ka niova fo ary lasa nivavaka tanteraka. Tsy nankasitrahan’ireo tompon’ny doany anefa izany ka nataony tamin’ny “fanaovana azy”. Nanomboka tamin’ny taona 2005 iny dia nisy ny fotoana nanapahan’olona ny volon-dohan’ity zazavavy, ary taorian’izay dia nisehoan-javatra ity zazavavy. Mi-delira ary manonona ilay doany. Teo no nahatsapan’ny ray amandreniny fa asa ratsin’ilay tompon’ny doany izao. Nitory tany amin’ny manampahefana ny havan’ilay zazavavy ka tonga nanatrika ny fandravana ilay doany ny mpampanoa lalàna any an-toerana sy ny zandary ao Ambatolampy.
Niantsoana mpiandry
Tamin’ny herin’ny androany kosa no nanome vaovao ho an’ny sampana fifohazana ao Amin’ny FJKM Ziona Anosibe ny havan’ilay zazavavy izay nangataka azy ireo hamongotra ilay doany. Nampitain’ny sampana fifohazana tany amin’ny foibe ny vaovao ka ity farany indray no nanangona ireo mpiandry avy amin’ny fiangonana FJKM maro. Mpiandry miisa 268 no tonga tany an-toerana tamin’ny Zoma hariva teo ka nivantana tao amin’ny FJKM Ambodiriana Fitiavana.
Ny Sabotsy maraina no nifamotoana teo anoloan’ity doany ity ny mponina manodidina sy ireo manampahefana ary ireo mpiandry rehetra.
Rovamanga
Trano iva iray fitehirizan’ireo tompon’ny doany ny karazana ody no antsoiny hoe “Rovamanga” Voamarin’ny ray amandrenin’ilay zazavavy narary fa volon-janany nisy nanala tany Ambatolampy no anisan’ny hita tao, nifangaro tamin’ireo fati-bolo samihafa niampy hety. Misy vato iray fanaovana sorona eo anoloan’ny Rovamanga. Fady kisoa sy fady miasa amin’ny andro Alakamisy ny faritra manodidina ity doany ity.
Ady mangotraka
Voatsiahy talohan’ny fandravana ilay doany fa raran’ny lalàna ny fitehirizana ody gasy toy itony. Ireo tompon’ny doany 3 lahy moa dia efa voatana any amin’ny zandary talohan’ny Sabotsy, ka ireo mponina tao an-tanana no nanatrika ny fandravana.
Nangorom-potsy ny tanàna niasan’ireo fifohazana, araka ny vaovao azo. Nanomboka tamin’ny vavaka sy fametraha-tanana, ka tsikaritr’ireo mpiandry fa nisy no tsy nahafoy ity doany ka tsy nanaiky nametraha-tanana. Araka ny fitazana ny sasany aza dia nisy ny nanantena ny hisehon’ny zava-mahagaga mety hahavoa ireo mpiandry izay heveriny ho mianankendry. Navoaka ny ody gasy rehetra ka nodorana ampahibemaso. Nodorana koa ilay doany ka rava tanteraka.
Fanaovana “Joro”
Isaky ny voalohan’ny taona dia fihaonamben’ireo mpanasina sy mpanompo ity doany ity ao Alatsinainy Bakaro. Mpitaiza amin’ny fomba gasy sy mpitsabo malaza no mpanasina sy mpanao sorona eo. Nino ny herin’izy io ny ankamaroan’ny mponina. Tamin’ny fotoana nandravana ny doany dia nisy tavoahangy iray tsy sahin’iza na iza nokasihina noho ny lazany. Nipoitra ho azy avy any ambanin’ny tany hono io tavoahangy io ka natahorana tokoa.
Resy ny devoly
Nandresy Andriamanitra!, izay no vokatra farany. Niasa tamin’ireo mpiandry sy izay nanatrika teo ny heriny ka tamin’iny andro iny ihany dia foana tanteraka ilay fanompoan-tsampy malaza. Nitomany nigogogogo ny mponina ka nizara roa dia ny hafaliana ho an’ireo nandresy ary hatezerana kosa ho an’ireo mbola tsy mahafoy ilay doany.
Madagascar Tribune
Mpandridra: Hery A
