Ny Aumônier National sy ny mpanampy azy
Ny Filoha sy ny Birao Nasionaly
Miarahaba antsika rehetra amin'ny anaran'ny Tompo.
Efa fantatsika rehetra moa fa isaky ny fotoana fankalazana ny Paka no misy ny RNS na Fihaonam-be ara-panatanjahantena ifanaovan'ny Malagasy eran'ny Frantsa. Tsy miova fa amin'ity taona ity dia any VICHY ihany no hanaovana azy dia ny 26 - 27 - 28 marsa 2005;
Hatrany am-boalohany dia miezaka ny Fiangonana mba hisy Fanompoam-pivavahana ny Paka : Eokaristia ho an'ny Katolika, Culte ho an'ny Protestanta. Satria ny PAKA no fety lehibe indrindra ho antsika kristianina. Manahirana anefa ny manatanteraka izany satria tsy miankina amin'ny Fiangonana ny RNS. Tsy azontsika atao koa ny mitsabaka amin'ny fandaminana ataon'ny hafa. Nisy foana ny ezaka mba fara-faharatsiny misy Fanompoam-pivavahana iarahana mankalaza ny Paka. Ary isaorana mialoha ireo zanaky ny Fiangonana manampy amin'izany.
Amin'ity taona 2005 ity dia nanao ezaka ny Komity mpanomana ny RNS , nanendry olona iray hifandray amin'ny FFKM FRANTSA. I Princis RAKOTOZAFY, mpiangona eto amin'ny Fiangonana Katolika Malagasy eto Paris . Naseho tamin'ny Komitin'ny FFKM FRANTSA izy ny Alahady 23 janoary, niaraka tamin'ny Filoham-piangonana telo mirahalahy ( Beloha, Pasitera RAVALITERA ary ny Révérend TOUTAIN). Niezaka ihany izahay sy Mompera Beloha mba hisy Fankalazana Eokaristia any amin'ny RNS fa tsy nanaiky ny Komity mpanomana noho tsy fisian'ny fotoana sady manahirana ho an-drizareo ny fifandraisana amin'ireo tsy mpivavaka sy hafa finoana satria ny RNS dia tsy miankina amin'ny Fiangonana ary tsy manao politika no tsy manavakavaka ara--pinoana na ara-poko na ara-pirazanana...
Efa zava-dehibe ny fanomezana alalana ny FFKM FRANTSA hanao Fanompoam-pivavahana. Isaorana ny Komity Mpanomana ny RNS izany.
Koa dia Fanompoam-pivavahana ekiomenika ihany izany no misy amin'ity taona ity. Manao antso avo ho an'ireo izay ho any amin'ny RNS 2005 izany mba hankalaza ny PAKA any toerana ary hampiely ny vaovao amin'ny Fiangonana rehetra. Aelezo izao filazana izao isam-piangonana :
FANOMPOAM-PIVAVAHANA EKIOMENIKA
Fankalazana ny PAKA
Karakarain'ny FFKM FRANTSA
NY ALAHADY 27 MARSA 2005 amin'ny 8 ora maraina
Any VICHY ho an'ireo izay mandray anjara amin'ny RNS
I Pasitera RANDRIA Christian ( FPMA )
I Mompera ANDRIANARIMANANA Léon, m.s. ( ANCMF / EKAR )
Koa aoka isika hanatona an'i Princy RAKOTOZAFY rehefa tonga any an-toerana mba hifandamina eo amin'ny fizaran-draharaha. Misy ezaka manokana eo amin'ny fanentanana mba ho maro ny kristianina hankalaza ny Paka.
Ho antsika katolika dia efa nisy ezaka tany aloha mba nasiana LAMESA saingy olona 10 raha be indrindra no tonga tao.
Koa samia ho tahian'Andriamanitra hanao Herinandro Masina tsara daholo.
ELIASY Liva, tonian'ny FFKM FRANTSA
